raushni ke rup mein KHushbu mein ya rangon mein aa

raushnī ke ruup meñ ḳhushbū meñ yā rañgoñ meñ aa

maiñ tujhe pahchān lūñgā kitne hī chehroñ meñ aa

band āñkhoñ meñ bhī kyā hogī tirī be-pardagī

chhīn le mujh se ye nīñdeñ yā mire ḳhvāboñ meñ aa

naach uThe raqqāsa-e-jāñ dhaḌkanoñ kī thaap par

saaz hāthoñ meñ uThā.e dil ke sannāToñ meñ aa

tū jo sharmātā hai mere sāmne aate hue

oḌh le merā tasavvur phir mirī bāhoñ meñ aa

kar diye haiñ zindagī ne muḳhtalif hisse mire

mujh se milnā hai agar baT kar ka.ī sāyoñ meñ aa

shahr meñ bhī ḳhaak uḌātī phir rahī haiñ vahshateñ

chhoḌ vīrāne 'muzaffar' ab galī-kūchoñ meñ aa

raushni ke rup mein KHushbu mein ya rangon mein aa

main tujhe pahchan lunga kitne hi chehron mein aa

band aankhon mein bhi kya hogi teri be-pardagi

chhin le mujh se ye ninden ya mere KHwabon mein aa

nach uThe raqqasa-e-jaan dhaDkanon ki thap par

saz hathon mein uThae dil ke sannaTon mein aa

tu jo sharmata hai mere samne aate hue

oDh le mera tasawwur phir meri bahon mein aa

kar diye hain zindagi ne muKHtalif hisse mere

mujh se milna hai agar baT kar kai sayon mein aa

shahr mein bhi KHak uDati phir rahi hain wahshaten

chhoD virane 'muzaffar' ab gali-kuchon mein aa