raushni lene chale the aur andhere chha gae

raushnī lene chale the aur andhere chhā ga.e

muskurāne bhī na paa.e the ki aañsū aa ga.e

aaj kitne dost mujh ko dekh kar katrā ga.e

allāh allāh ab mohabbat meñ ye din bhī aa ga.e

jab bhī aayā hai kisī ko bhuul jaane kā ḳhayāl

yak-ba-yak āvāz aa.ī lījiye ham aa ga.e

aah vo manzil jo merī ġhaflatoñ se gum huī

haa.e vo rahbar jo mujh ko raah se bhaTkā ga.e

phir ye rah rah kar kisī kī yaad taḌpātī hai kyuuñ

ab to ham tark-e-mohabbat kī qasam bhī khā ga.e

dekh kar un kī nigāh-e-lutf ik muddat ke baad

kyā batā.eñ kyā ḳhayāl aayā ki aañsū aa ga.e

un ke hī qadmoñ kī aahaT raat bhar aatī rahī

dil kī har dhaḌkan pe ham samjhe ki vo ḳhud aa ga.e

ab koī dair o haram se bhī sadā aatī nahīñ

ham tirī dhun meñ ḳhudā jaane kahāñ tak aa ga.e

raushni lene chale the aur andhere chha gae

muskurane bhi na pae the ki aansu aa gae

aaj kitne dost mujh ko dekh kar katra gae

allah allah ab mohabbat mein ye din bhi aa gae

jab bhi aaya hai kisi ko bhul jaane ka KHayal

yak-ba-yak aawaz aai lijiye hum aa gae

aah wo manzil jo meri ghaflaton se gum hui

hae wo rahbar jo mujh ko rah se bhaTka gae

phir ye rah rah kar kisi ki yaad taDpati hai kyun

ab to hum tark-e-mohabbat ki qasam bhi kha gae

dekh kar un ki nigah-e-lutf ek muddat ke baad

kya bataen kya KHayal aaya ki aansu aa gae

un ke hi qadmon ki aahaT raat bhar aati rahi

dil ki har dhaDkan pe hum samjhe ki wo KHud aa gae

ab koi dair o haram se bhi sada aati nahin

hum teri dhun mein KHuda jaane kahan tak aa gae