rawan dawan nahin yan ashk chashm-e-tar ki tarah

ravāñ davāñ nahīñ yaañ ashk chashm-e-tar kī tarah

girah meñ rakhte haiñ ham aabrū guhar kī tarah

sunī sifat kisī ḳhush-chashm kī jo mardum se

ḳhayāl dauḌ gayā aañkh par nazar kī tarah

chhupī na ḳhalq-e-ḳhudā se haqīqat-e-ḳhat-e-shauq

uḌā jahāñ meñ kabūtar mirā ḳhabar kī tarah

sivā.e yaar na dekhā kuchh aur aalam meñ

samā gayā vo mirī aañkh meñ nazar kī tarah

adam kī raah meñ khaTkā rahā jahannam kā

safar ne dil ko jalāyā mire saqar kī tarah

khule jo sab to bañdhā taar mīThī bātoñ kā

shakar girah meñ vo rakhte haiñ neshkar kī tarah

vo andalīb huuñ shahpar jo merā mil jaa.e

chaḌhā.eñ sar pe salātīñ humā ke par kī tarah

zakāt de zar-e-gul kī bahār meñ gulchīñ

chaman meñ phuul luTā ashrafī ke zar kī tarah

girī hai chhuT ke jo zaanū pe shaam ko afshāñ

sitāre yaar ke dāman meñ haiñ sahar kī tarah

mushā.ire kā 'amānat' hai kis ko hijr meñ hosh

kahāñ ke sher kahāñ kī ġhazal kidhar kī tarah

rawan dawan nahin yan ashk chashm-e-tar ki tarah

girah mein rakhte hain hum aabru guhar ki tarah

suni sifat kisi KHush-chashm ki jo mardum se

KHayal dauD gaya aankh par nazar ki tarah

chhupi na KHalq-e-KHuda se haqiqat-e-KHat-e-shauq

uDa jahan mein kabutar mera KHabar ki tarah

siwae yar na dekha kuchh aur aalam mein

sama gaya wo meri aankh mein nazar ki tarah

adam ki rah mein khaTka raha jahannam ka

safar ne dil ko jalaya mere saqar ki tarah

khule jo sab to bandha tar miThi baaton ka

shakar girah mein wo rakhte hain neshkar ki tarah

wo andalib hun shahpar jo mera mil jae

chaDhaen sar pe salatin huma ke par ki tarah

zakat de zar-e-gul ki bahaar mein gulchin

chaman mein phul luTa ashrafi ke zar ki tarah

giri hai chhuT ke jo zanu pe sham ko afshan

sitare yar ke daman mein hain sahar ki tarah

mushaire ka 'amanat' hai kis ko hijr mein hosh

kahan ke sher kahan ki ghazal kidhar ki tarah