rawan in paniyon par bulbule hain

ravāñ in pāniyoñ par bulbule haiñ

sadaf gahre samundar meñ rakhe haiñ

shagūfe phūTte haiñ naḳhl-e-dil par

mire bachche mujhe jab chūmte haiñ

havā meñ titliyāñ uḌtī haiñ ab bhī

abhī tak log hañste bolte haiñ

tumheñ mālūm hai nā in laboñ par

mire hisse ke kuchh bose paḌe haiñ

hamāre saath rahte haiñ hamesha

baḌe achchhe hamāre mas.ale haiñ

mire jehlam tire dariyā ke ab bhī

mirī āñkhoñ se gahre rābte haiñ

zamīñ ko us kī miTTī sauñpnā thī

falak se is liye ham aa ga.e haiñ

ye kaise bādshāh-e-vaqt haiñ jo

mire ma.asūm bachche mārte haiñ

yahī āvāz aatī hai darūñ se

ham apnī raah se bhaTke hue haiñ

rawan in paniyon par bulbule hain

sadaf gahre samundar mein rakhe hain

shagufe phuTte hain naKHl-e-dil par

mere bachche mujhe jab chumte hain

hawa mein titliyan uDti hain ab bhi

abhi tak log hanste bolte hain

tumhein malum hai na in labon par

mere hisse ke kuchh bose paDe hain

hamare sath rahte hain hamesha

baDe achchhe hamare masale hain

mere jehlam tere dariya ke ab bhi

meri aankhon se gahre rabte hain

zamin ko us ki miTTi saunpna thi

falak se is liye hum aa gae hain

ye kaise baadshah-e-waqt hain jo

mere masum bachche marte hain

yahi aawaz aati hai darun se

hum apni rah se bhaTke hue hain