rawish-e-husn-e-muraat chali jati hai

ravish-e-husn-e-murā.āt chalī jaatī hai

ham se aur un se vahī baat chalī jaatī hai

us jafā-jū se bā-īmā-e-tamannā ab tak

havas-e-lutf-o-ināyāt chalī jaatī hai

mil hī jaate haiñ pashīmāni-e-ġham ke asbāb

shauq-e-hirmāñ kī mudārāt chalī jaatī hai

ham se har-chand vo zāhir meñ ḳhafā haiñ lekin

koshish-e-pursish-e-hālāt chalī jaatī hai

din ko ham un se bigaḌte haiñ vo shab ko ham se

rasm-e-pābandi-e-auqāt chalī jaatī hai

us sitamgar ko sitamgar nahīñ kahte bantā

sa.i-e-tāvīl-e-ḳhayālāt chalī jaatī hai

nigah-e-yār se pā lete haiñ dil kī bāteñ

shohrat-e-kashf-o-karāmāt chalī jaatī hai

hairat-e-husn ne majbūr kiyā hai 'hasrat'

vasl-e-jānāñ kī yūñhī raat chalī jaatī hai

rawish-e-husn-e-muraat chali jati hai

hum se aur un se wahi baat chali jati hai

us jafa-ju se ba-ima-e-tamanna ab tak

hawas-e-lutf-o-inayat chali jati hai

mil hi jate hain pashimani-e-gham ke asbab

shauq-e-hirman ki mudaraat chali jati hai

hum se har-chand wo zahir mein KHafa hain lekin

koshish-e-pursish-e-haalat chali jati hai

din ko hum un se bigaDte hain wo shab ko hum se

rasm-e-pabandi-e-auqat chali jati hai

us sitamgar ko sitamgar nahin kahte banta

sai-e-tawil-e-KHayalat chali jati hai

nigah-e-yar se pa lete hain dil ki baaten

shohrat-e-kashf-o-karamat chali jati hai

hairat-e-husn ne majbur kiya hai 'hasrat'

wasl-e-jaanan ki yunhi raat chali jati hai