reg-e-rawan pe naqsh-e-kaf-e-pa na dekhna

reg-e-ravāñ pe naqsh-e-kaf-e-pā na dekhnā

ā.īna-e-zamīr meñ chehrā na dekhnā

be-sarfa hai lahū kī tamāzat mire liye

asrār-e-jism-o-jāñ ko barahna na dekhnā

jo āñsuoñ ke lā'l-o-javāhar bikher de

us ek mauj-e-dard ko uThtā na dekhnā

rātoñ kā chain din kā sukūñ ho agar 'azīz

chaltā hai saath saath jo saaya na dekhnā

hai shab kī āstīñ meñ gunāhoñ kī raushnī

zaḳhm-e-nazar se sūrat-e-zebā na dekhnā

ham bhī fasīl-e-shahr ke saa.e meñ aa ruke

vā ho dar-e-murād to sahrā na dekhnā

ye ehtiyāt-e-vaz-e-junūñ hī nahīñ magar

rāh-e-vafā meñ apne ko begāna dekhnā

har shāḳh par jale hue lamhoñ kī raakh hai

fasl-e-bahār zaḳhm-e-tamannā na dekhnā

reg-e-rawan pe naqsh-e-kaf-e-pa na dekhna

aaina-e-zamir mein chehra na dekhna

be-sarfa hai lahu ki tamazat mere liye

asrar-e-jism-o-jaan ko barahna na dekhna

jo aansuon ke la'l-o-jawahar bikher de

us ek mauj-e-dard ko uThta na dekhna

raaton ka chain din ka sukun ho agar 'aziz

chalta hai sath sath jo saya na dekhna

hai shab ki aastin mein gunahon ki raushni

zaKHm-e-nazar se surat-e-zeba na dekhna

hum bhi fasil-e-shahr ke sae mein aa ruke

wa ho dar-e-murad to sahra na dekhna

ye ehtiyat-e-waz-e-junun hi nahin magar

rah-e-wafa mein apne ko begana dekhna

har shaKH par jale hue lamhon ki rakh hai

fasl-e-bahaar zaKHm-e-tamanna na dekhna