reza-reza hue yun subh ke aasar ki bas

reza-reza hue yuuñ sub.h ke āsār ki bas

aise ḳhvāboñ pe chalā.ī ga.ī talvār ki bas

sham.a kyā bujh sā gayā saarā jahān-e-āvāz

is qadar zor se chillā.ī shab-e-tār ki bas

kisī zindāñ kī zarūrat hī nahīñ pesh aa.ī

shahr kā shahr huā aisā giraftār ki bas

ḳhud-baḳhud pahuñche hai gul gosha-e-dastār ke paas

bāġhbāñ aisā bikā hai sar-e-darbār ki bas

log apne hī gharoñ ko nahīñ pahchān sake

lafz vo likkhe ga.e bar-sar-e-dīvār ki bas

ham ne chāhā thā ki be-sāḳhta-pan tum sā ho

aise bebāk hue shahr ke dildār ki bas

jaise maftūh na ho fāteh-e-sad-ālam ho

dil ne yuuñ Daal diye ishq meñ hathiyār ki bas

dīda-o-dil ko rahī parda-e-ġhaflat kī talāsh

āgahī ne vo kiyā ham ko gunahgār ki bas

reza-reza hue yun subh ke aasar ki bas

aise KHwabon pe chalai gai talwar ki bas

shama kya bujh sa gaya sara jahan-e-awaz

is qadar zor se chillai shab-e-tar ki bas

kisi zindan ki zarurat hi nahin pesh aai

shahr ka shahr hua aisa giraftar ki bas

KHud-baKHud pahunche hai gul gosha-e-dastar ke pas

baghban aisa bika hai sar-e-darbar ki bas

log apne hi gharon ko nahin pahchan sake

lafz wo likkhe gae bar-sar-e-diwar ki bas

hum ne chaha tha ki be-saKHta-pan tum sa ho

aise bebak hue shahr ke dildar ki bas

jaise maftuh na ho fateh-e-sad-alam ho

dil ne yun Dal diye ishq mein hathiyar ki bas

dida-o-dil ko rahi parda-e-ghaflat ki talash

aagahi ne wo kiya hum ko gunahgar ki bas