rind-e-KHarab-haal ko zahid na chheD tu

rind-e-ḳharāb-hāl ko zāhid na chheḌ tū

tujh ko parā.ī kyā paḌī apnī nabeḌ tū

nāḳhun ḳhudā na de tujhe ai panja-e-junūñ

degā tamām aql ke baḳhiye udheḌ tū

is said-e-muztarib ko tahammul se zab.h kar

dāmān o āstīñ na lahū meñ laTheḌ tū

chhuTtā hai kaun mar ke giraftār-e-dām-e-zulf

turbat pe us kī jaal kā pā.egā peḌ tū

ai zāhid-e-do-rañg na piir aap ko banā

mānind-e-sub.h-e-kāzib abhī hai adheḌ tū

ye tañgnā.e-dahr nahīñ manzil-e-farāġh

ġhāfil na paañv hirs ke phailā sukeḌ tū

ho qat.a naḳhl-e-ulfat agar phir bhī sabz ho

kyā ho jo pheñke jaḌ hī se us ko ukheḌ tū

jo sotī bhiiḌ bā.is-e-ġhauġhā jagā.e phir

darvāza ghar kā us sag-e-duniyā pe bheḌ tū

umr-e-ravāñ kā tausan-e-chālāk is liye

tujh ko diyā ki jald kare yaañ se eḌ tū

āvārgī se kū-e-mohabbat kī haath uThā

ai 'zauq' ye uThā na sakegā khakheḌ tū

rind-e-KHarab-haal ko zahid na chheD tu

tujh ko parai kya paDi apni nabeD tu

naKHun KHuda na de tujhe ai panja-e-junun

dega tamam aql ke baKHiye udheD tu

is said-e-muztarib ko tahammul se zabh kar

daman o aastin na lahu mein laTheD tu

chhuTta hai kaun mar ke giraftar-e-dam-e-zulf

turbat pe us ki jal ka paega peD tu

ai zahid-e-do-rang na pir aap ko bana

manind-e-subh-e-kazib abhi hai adheD tu

ye tangnae-dahr nahin manzil-e-faragh

ghafil na panw hirs ke phaila sukeD tu

ho qata naKHl-e-ulfat agar phir bhi sabz ho

kya ho jo phenke jaD hi se us ko ukheD tu

jo soti bhiD bais-e-ghaugha jagae phir

darwaza ghar ka us sag-e-duniya pe bheD tu

umr-e-rawan ka tausan-e-chaalak is liye

tujh ko diya ki jald kare yan se eD tu

aawargi se ku-e-mohabbat ki hath uTha

ai 'zauq' ye uTha na sakega khakheD tu