rindan-e-baada-nosh ki chhagal uTha to la

rindān-e-bāda-nosh kī chhāgal uThā to lā

bād-e-bahār dauḌ ke bādal uThā to lā

aa umr-e-rafta hashr ke dam-ḳham bhī dekh leñ

tūfān-e-zindagī kī vo halchal uThā to lā

sar se dayār-e-ġham ke sanīchar utaar de

mañgal hai jis meñ jā ke vo jañgal uThā to lā

lālach batā ke duur se vaa.iz kā rañg dekh

ḳhālī hī kyuuñ na ho koī botal uThā to lā

ai zindagī junūñ na sahī be-ḳhudī sahī

tū kuchh bhī apnī aql se pāgal uThā to lā

aatī hai yaad sub.h-e-masarrat kī baar baar

ḳhurshīd aate aate use kal uThā to lā

kashtī hai ghaaT par to chale kyuuñ na daur aaj

kal bas chale chale na chale chal uThā to lā

'nātiq' junūn-e-ḳhidmat-e-ahbāb kis liye

dekheñ to kyā milā hai tujhe phal uThā to lā

rindan-e-baada-nosh ki chhagal uTha to la

baad-e-bahaar dauD ke baadal uTha to la

aa umr-e-rafta hashr ke dam-KHam bhi dekh len

tufan-e-zindagi ki wo halchal uTha to la

sar se dayar-e-gham ke sanichar utar de

mangal hai jis mein ja ke wo jangal uTha to la

lalach bata ke dur se waiz ka rang dekh

KHali hi kyun na ho koi botal uTha to la

ai zindagi junun na sahi be-KHudi sahi

tu kuchh bhi apni aql se pagal uTha to la

aati hai yaad subh-e-masarrat ki bar bar

KHurshid aate aate use kal uTha to la

kashti hai ghaT par to chale kyun na daur aaj

kal bas chale chale na chale chal uTha to la

'natiq' junun-e-KHidmat-e-ahbab kis liye

dekhen to kya mila hai tujhe phal uTha to la