rishta-e-dil ko maine toD diya

rishta-e-dil ko maiñ ne toḌ diyā

baat karnā bhī un se chhoḌ diyā

ab na aañsū haiñ aur na aaheñ haiñ

dil ko un kī taraf se moḌ diyā

un ke jaane pe ye huā mahsūs

ruuh ne goyā jism chhoḌ diyā

aable chalne meñ jo the haa.il

ḳhār-e-sahrā ne un ko phoḌ diyā

hai yaqīnan vo qābil-e-tausīf

jis ne TuuTe diloñ ko joḌ diyā

vaqt kā zor us pe kyā jis ne

panja-e-vaqt ko maroḌ diyā

us ne aañsū kī aarzū kī thī

ham ne 'ḳhurshīd' dil nichoḌ diyā

rishta-e-dil ko main ne toD diya

baat karna bhi un se chhoD diya

ab na aansu hain aur na aahen hain

dil ko un ki taraf se moD diya

un ke jaane pe ye hua mahsus

ruh ne goya jism chhoD diya

aable chalne mein jo the hail

KHar-e-sahra ne un ko phoD diya

hai yaqinan wo qabil-e-tausif

jis ne TuTe dilon ko joD diya

waqt ka zor us pe kya jis ne

panja-e-waqt ko maroD diya

us ne aansu ki aarzu ki thi

hum ne 'KHurshid' dil nichoD diya