rishte mein teri zulf ke hai jaan hamara

rishte meñ tirī zulf ke hai jaan hamārā

bejā nahīñ sumbul ke upar maan hamārā

sarmā-e-āshufta-dilī jam.a huā hai

aa dekh sanam hāl-e-pareshān hamārā

jiyūñ sūrat-e-dīvār huā mahv-e-tamannā

mushtāq tirā hai dil-e-hairān hamārā

darpesh hai ham kuuñ safar-e-manzil-e-maqsūd

bas āh-e-sahar-gāh ye sāmān hamārā

tere lab-e-shīrīñ kī sunā jab siiñ hikāyat

kāshāna-e-zambūr huā kaan hamārā

majnūñ kī tarah vahshī sahrā-e-junūñ nahīñ

hai vus.at-e-mashrab setī maidān hamārā

kahte haiñ tirī zulf kuuñ dekh ahl-e-sharī.at

qurbān hai is kufr par īmān hamārā

āzād kiye qaid siiñ tasbīh kī us kuuñ

hai gardan-e-zunnār pe ehsān hamārā

siina ke tabaq meñ hai kabāb-e-dil-e-pur-soz

jis din se ġham-e-hijr hai mehmān hamārā

ai shoḳh kashish siiñ tire abrū kī kamāñ kī

dil haath siiñ jaatā hai har ik aan hamārā

ai jān-e-'sirāj' ek ġhazal dard kī sun jā

majmūa-e-ahvāl hai dīvān hamārā

rishte mein teri zulf ke hai jaan hamara

beja nahin sumbul ke upar man hamara

sarma-e-ashufta-dili jama hua hai

aa dekh sanam haal-e-pareshan hamara

jiyun surat-e-diwar hua mahw-e-tamanna

mushtaq tera hai dil-e-hairan hamara

darpesh hai hum kun safar-e-manzil-e-maqsud

bas aah-e-sahar-gah ye saman hamara

tere lab-e-shirin ki suna jab sin hikayat

kashana-e-zambur hua kan hamara

majnun ki tarah wahshi sahra-e-junun nahin

hai wusat-e-mashrab seti maidan hamara

kahte hain teri zulf kun dekh ahl-e-shariat

qurban hai is kufr par iman hamara

aazad kiye qaid sin tasbih ki us kun

hai gardan-e-zunnar pe ehsan hamara

sina ke tabaq mein hai kabab-e-dil-e-pur-soz

jis din se gham-e-hijr hai mehman hamara

ai shoKH kashish sin tere abru ki kaman ki

dil hath sin jata hai har ek aan hamara

ai jaan-e-'siraj' ek ghazal dard ki sun ja

majmua-e-ahwal hai diwan hamara