bahut hi parde mein izhaar-e-arzu karte

bahut hī parde meñ iz.hār-e-ārzū karte

nigāheñ kahtī haiñ ham un se guftugū karte

sharāb-e-nāb se saaqī jo ham vuzū karte

haram ke log tavāf-e-ḳhum-o-subū karte

vo mil ke dast-e-hinā.ī se dil lahū karte

ham aarzū to hasīñ ḳhūn-e-ārzū karte

daroġh-bāfī-e-dushman kā haal kyā khultā

jo parda chaak bhī hotā to vo rafū karte

utaar laate unheñ bām-e-tūr se dil meñ

ham iḳhtiyār vo andāz-e-guftugū karte

Dare vo kyuuñ mire phūloñ meñ aatī mil ke hinā

ye phuul ḳhaak tamannā-e-rañg-o-bū karte

kalīm ko na ġhash aatā na tuur hī jaltā

dabī zabān se iz.hār-e-ārzū karte

jo zarf-e-āb hameñ mai-kade meñ mil jaatā

namāz ka.abe meñ paḌhte yahāñ vuzū karte

mah-e-siyām meñ mauqa jo shab ko mil jaatā

to ek saañs meñ ḳhālī ḳhum-o-subū karte

sharāb piite hī sajde meñ un ko girnā thā

ye shaġhl baiTh ke mai-nosh qibla-rū karte

har ek qatre se bahtī riyāz jū-e-sharāb

jo pī ke ham sar-e-zamzam kabhī vuzū karte

bahut hi parde mein izhaar-e-arzu karte

nigahen kahti hain hum un se guftugu karte

sharab-e-nab se saqi jo hum wuzu karte

haram ke log tawaf-e-KHum-o-subu karte

wo mil ke dast-e-hinai se dil lahu karte

hum aarzu to hasin KHun-e-arzu karte

darogh-bafi-e-dushman ka haal kya khulta

jo parda chaak bhi hota to wo rafu karte

utar late unhen baam-e-tur se dil mein

hum iKHtiyar wo andaz-e-guftugu karte

Dare wo kyun mere phulon mein aati mil ke hina

ye phul KHak tamanna-e-rang-o-bu karte

kalim ko na ghash aata na tur hi jalta

dabi zaban se izhaar-e-arzu karte

jo zarf-e-ab hamein mai-kade mein mil jata

namaz kabe mein paDhte yahan wuzu karte

mah-e-siyam mein mauqa jo shab ko mil jata

to ek sans mein KHali KHum-o-subu karte

sharab pite hi sajde mein un ko girna tha

ye shaghl baiTh ke mai-nosh qibla-ru karte

har ek qatre se bahti riyaz ju-e-sharab

jo pi ke hum sar-e-zamzam kabhi wuzu karte