ro raha tha main bhari barsat thi

ro rahā thā maiñ bharī barsāt thī

haal kyā khultā añdherī raat thī

mere nāloñ se hai barham bāġhbāñ

ye ḳhafā hone kī koī baat thī

din nahīñ dekhā sivā-e-shām-e-hijr

zindagī-bhar meñ yahī ik raat thī

nāla-o-āh-o-fuġhāñ se baḌh ga.ī

varna ulfat ik zarā sī baat thī

hashr tak laayā jahāñ se dard-e-dil

kis ko detā kyā koī sauġhāt thī

band kiiñ āñkheñ ki dekhūñ ḳhvāb-e-sub.h

khol kar jab aañkh dekhā raat thī

ai sabā ġhunchoñ ne hañs kar kyā kahā

un kā qissa thā ki merī baat thī

allāh allāh vahdat-e-shām-e-firāq

ek merī ek us kī zaat thī

aap hī gin deñ masā.ib hijr ke

yuuñ to kahne ke liye ik raat thī

hichkiyoñ se rāz-e-ulfat khul gayā

aa ga.ī muñh par jo dil meñ baat thī

sham-e-marqad tujh se shikva hai mujhe

mere ghar meñ bhī añdherī raat thī

kuchh na kuchh 'sāqib' ne paidā kar liyā

ye zamīñ to dushman-e-abyāt thī

ro raha tha main bhari barsat thi

haal kya khulta andheri raat thi

mere nalon se hai barham baghban

ye KHafa hone ki koi baat thi

din nahin dekha siwa-e-sham-e-hijr

zindagi-bhar mein yahi ek raat thi

nala-o-ah-o-fughan se baDh gai

warna ulfat ek zara si baat thi

hashr tak laya jahan se dard-e-dil

kis ko deta kya koi saughat thi

band kin aankhen ki dekhun KHwab-e-subh

khol kar jab aankh dekha raat thi

ai saba ghunchon ne hans kar kya kaha

un ka qissa tha ki meri baat thi

allah allah wahdat-e-sham-e-firaq

ek meri ek us ki zat thi

aap hi gin den masaib hijr ke

yun to kahne ke liye ek raat thi

hichkiyon se raaz-e-ulfat khul gaya

aa gai munh par jo dil mein baat thi

sham-e-marqad tujh se shikwa hai mujhe

mere ghar mein bhi andheri raat thi

kuchh na kuchh 'saqib' ne paida kar liya

ye zamin to dushman-e-abyat thi