ro rahi hai jis tarah ye shama parwane ke baad

ro rahī hai jis tarah ye sham.a parvāne ke ba.ad

aap bhī ro.eñge mujh ko mere mar jaane ke ba.ad

gar nahīñ miltī sharāb-e-nāb aañsū hī sahī

kuchh to piinā chāhiye furqat meñ ġham khāne ke ba.ad

rashk-e-jannat ban gayā thā aap ke aane se ghar

ho gayā dozaḳh se bad-tar phir chale jaane ke ba.ad

kyā ḳhabar ham bad-nasīboñ ko hai kyā shai-e-bahār

ham ne to gulshan ko dekhā hai ujaḌ jaane ke ba.ad

kyā batā.eñ tujh ko vaa.iz mai-kashī ke ham maze

aap ho jā.eñge ma.alūm ek paimāne ke ba.ad

rā.egāñ hone na do ai 'shauq' tum vaqt-e-azīz

ye vo shai hai jo nahīñ miltī hai kho jaane ke ba.ad

ro rahi hai jis tarah ye shama parwane ke baad

aap bhi roenge mujh ko mere mar jaane ke baad

gar nahin milti sharab-e-nab aansu hi sahi

kuchh to pina chahiye furqat mein gham khane ke baad

rashk-e-jannat ban gaya tha aap ke aane se ghar

ho gaya dozaKH se bad-tar phir chale jaane ke baad

kya KHabar hum bad-nasibon ko hai kya shai-e-bahaar

hum ne to gulshan ko dekha hai ujaD jaane ke baad

kya bataen tujh ko waiz mai-kashi ke hum maze

aap ho jaenge malum ek paimane ke baad

raegan hone na do ai 'shauq' tum waqt-e-aziz

ye wo shai hai jo nahin milti hai kho jaane ke baad