ro ro ke ghairon ko hansana hum bhi kitne pagal hain

ro ro ke ġhairoñ ko hañsānā ham bhī kitne pāgal haiñ

yuuñ apnoñ ko aur rulānā ham bhī kitne pāgal haiñ

sachchoñ ko jhūTā gardānā ham bhī kitne pāgal haiñ

aur jhūToñ ko sachchā jaanā ham bhī kitne pāgal haiñ

aql-o-ḳhirad ne aksar Tokā un kī baat nahīñ maanī

apne dil kā kahnā maanā ham bhī kitne pāgal haiñ

apne ghar ko aag lagā kar un ke dar pe aa baiThe

begānoñ ko apnā jaanā ham bhī kitne pāgal haiñ

ahl-e-ḳhirad ko pāgal jaanā ahl-e-junūñ ko dīvāna

apne ko samjhā farzāna ham bhī kitne pāgal haiñ

jab un kī mahfil meñ baiThe hukm milā uTh jaane kā

phir bhī rakkhā ānā-jānā ham bhī kitne pāgal haiñ

ġhair ko apnā jaanā 'ālim' ThanDe dil se baat sunī

apnoñ ko samjhā begānā ham bhī kitne pāgal haiñ

ro ro ke ghairon ko hansana hum bhi kitne pagal hain

yun apnon ko aur rulana hum bhi kitne pagal hain

sachchon ko jhuTa gardana hum bhi kitne pagal hain

aur jhuTon ko sachcha jaana hum bhi kitne pagal hain

aql-o-KHirad ne aksar Toka un ki baat nahin mani

apne dil ka kahna mana hum bhi kitne pagal hain

apne ghar ko aag laga kar un ke dar pe aa baiThe

beganon ko apna jaana hum bhi kitne pagal hain

ahl-e-KHirad ko pagal jaana ahl-e-junun ko diwana

apne ko samjha farzana hum bhi kitne pagal hain

jab un ki mahfil mein baiThe hukm mila uTh jaane ka

phir bhi rakkha aana-jaana hum bhi kitne pagal hain

ghair ko apna jaana 'alim' ThanDe dil se baat suni

apnon ko samjha begana hum bhi kitne pagal hain