bhaDkaen meri pyas ko aksar teri aankhen

bhaḌkā.eñ mirī pyaas ko aksar tirī āñkheñ

sahrā mirā chehrā hai samundar tirī āñkheñ

phir kaun bhalā dād-e-tabassum unheñ degā

ro.eñgī bahut mujh se bichhaḌ kar tirī āñkheñ

ḳhālī jo huī shām-e-ġharībāñ kī hathelī

kyā kyā na luTātī rahīñ gauhar terī āñkheñ

bojhal nazar aatī haiñ ba-zāhir mujhe lekin

khultī haiñ bahut dil meñ utar kar tirī āñkheñ

ab tak mirī yādoñ se miTā.e nahīñ miTtā

bhīgī huī ik shaam kā manzar tirī āñkheñ

mumkin ho to ik taaza ġhazal aur bhī kah luuñ

phir oḌh na leñ ḳhvāb kī chādar tirī āñkheñ

maiñ sañg-sifat ek hī raste meñ khaḌā huuñ

shāyad mujhe dekheñgī palaT kar tirī āñkheñ

yuuñ dekhte rahnā use achchhā nahīñ 'mohsin'

vo kāñch kā paikar hai to patthar tirī āñkheñ

bhaDkaen meri pyas ko aksar teri aankhen

sahra mera chehra hai samundar teri aankhen

phir kaun bhala dad-e-tabassum unhen dega

roengi bahut mujh se bichhaD kar teri aankhen

KHali jo hui sham-e-ghariban ki hatheli

kya kya na luTati rahin gauhar teri aankhen

bojhal nazar aati hain ba-zahir mujhe lekin

khulti hain bahut dil mein utar kar teri aankhen

ab tak meri yaadon se miTae nahin miTta

bhigi hui ek sham ka manzar teri aankhen

mumkin ho to ek taza ghazal aur bhi kah lun

phir oDh na len KHwab ki chadar teri aankhen

main sang-sifat ek hi raste mein khaDa hun

shayad mujhe dekhengi palaT kar teri aankhen

yun dekhte rahna use achchha nahin 'mohsin'

wo kanch ka paikar hai to patthar teri aankhen