rone ka saliqa mujhe aslaf ne baKHsha

rone kā salīqa mujhe aslāf ne baḳhshā

ye mātamī āñkheñ mujhe virse meñ milī haiñ

ye karb kī duniyā kā hai naqsha ise dekho

sab purkheñ hamārī isī shajre meñ milī haiñ

maiñ ghuur ke dekhūñ to burā māntā hai vo

kaise kahūñ ye talḳhiyāñ tarke meñ milī haiñ

ḳhvāboñ ne bhī marne kī hī Thānī hai bil-āḳhir

do chaar kī lāsheñ mire kamre meñ milī haiñ

TuuTe hue rastoñ pe tirā haath pakaḌ luuñ

ye ḳhvāhisheñ bas ishq ke badle meñ milī haiñ

jo laḌkiyāñ jiitī thiiñ mohabbat ke sahāre

do gaz kī hī qabreñ unheñ tohfe meñ milī haiñ

rone ka saliqa mujhe aslaf ne baKHsha

ye matami aankhen mujhe wirse mein mili hain

ye karb ki duniya ka hai naqsha ise dekho

sab purkhen hamari isi shajre mein mili hain

main ghur ke dekhun to bura manta hai wo

kaise kahun ye talKHiyan tarke mein mili hain

KHwabon ne bhi marne ki hi Thani hai bil-aKHir

do chaar ki lashen mere kamre mein mili hain

TuTe hue raston pe tera hath pakaD lun

ye KHwahishen bas ishq ke badle mein mili hain

jo laDkiyan jiti thin mohabbat ke sahaare

do gaz ki hi qabren unhen tohfe mein mili hain