roz badli hui duniya ki faza dekhte hain

roz badlī huī duniyā kī fazā dekhte haiñ

aaj kis samt meñ chaltī hai havā dekhte haiñ

jo bhī hotā hai vo hotā hai umīdoñ ke ḳhilāf

dil meñ kyā sochte haiñ aañkh se kyā dekhte haiñ

pahle sunte the kahīñ qatl huā hai koī

ab to ye khel shab-o-roz khulā dekhte haiñ

ham kahīñ aag bujhāne ke liye nikle the

vāpas aa.e haiñ to ghar apnā jalā dekhte haiñ

qatl-o-ḳhūñ band huā raqs-e-junūñ ḳhatm huā

shahr meñ kaun marā kaun jiyā dekhte haiñ

mudda.ā ḳhud unheñ mālūm hai palkeñ nam rakh

vo talabgār kā andāz-e-duā dekhte haiñ

us ke anjām se dil kāñpne lagtā hai 'zafar'

jab sar-e-shām koī phuul khilā dekhte haiñ

roz badli hui duniya ki faza dekhte hain

aaj kis samt mein chalti hai hawa dekhte hain

jo bhi hota hai wo hota hai umidon ke KHilaf

dil mein kya sochte hain aankh se kya dekhte hain

pahle sunte the kahin qatl hua hai koi

ab to ye khel shab-o-roz khula dekhte hain

hum kahin aag bujhane ke liye nikle the

wapas aae hain to ghar apna jala dekhte hain

qatl-o-KHun band hua raqs-e-junun KHatm hua

shahr mein kaun mara kaun jiya dekhte hain

muddaa KHud unhen malum hai palken nam rakh

wo talabgar ka andaz-e-dua dekhte hain

us ke anjam se dil kanpne lagta hai 'zafar'

jab sar-e-sham koi phul khila dekhte hain