roz dekha hai shafaq se wo pighalta sona

roz dekhā hai shafaq se vo pighaltā sonā

roz sochā hai ki tum mere ho mere ho nā

maiñ to ik kāñch ke dariyā meñ bahī jaatī huuñ

khankhanāte hue hamrāz mujhe sun lo nā

maiñ ne kānoñ meñ pahan lī hai tumhārī āvāz

ab mire vāste be-kār haiñ chāñdī sonā

merī ḳhāmoshī ko chupke se sajā do aa kar

ik ġhazal tum bhī mire naam kabhī likkho nā

ruuh meñ giit utar jaate haiñ jaise ḳhushbū

gungunātī sī koī shaam mujhe bhejo nā

chāñdnī os ke qatroñ meñ simaT jā.egī

tīrgī sub.h savere meñ kahīñ kho do nā

phir se āñkhoñ meñ koī rañg sajā luuñ 'naināñ'

kab se ḳhvāboñ ko yahāñ bhuul ga.ī thī bonā

roz dekha hai shafaq se wo pighalta sona

roz socha hai ki tum mere ho mere ho na

main to ek kanch ke dariya mein bahi jati hun

khankhanate hue hamraaz mujhe sun lo na

main ne kanon mein pahan li hai tumhaari aawaz

ab mere waste be-kar hain chandi sona

meri KHamoshi ko chupke se saja do aa kar

ek ghazal tum bhi mere nam kabhi likkho na

ruh mein git utar jate hain jaise KHushbu

gungunati si koi sham mujhe bhejo na

chandni os ke qatron mein simaT jaegi

tirgi subh sawere mein kahin kho do na

phir se aankhon mein koi rang saja lun 'nainan'

kab se KHwabon ko yahan bhul gai thi bona