roz-e-awwal hi KHata-kar banaya gaya hun

roz-e-avval hī ḳhatā-kār banāyā gayā huuñ

aur phir ashraf-e-maḳhlūq batāyā gayā huuñ

TūTne aur bikharne pe hai vāvailā kyoñ

dekhiye kitnī bulandī se girāyā gayā huuñ

iḳhtiyārāt se taqdīr se kyā lenā hai

vaqt kī gard meñ tinkā sā uḌāyā gayā huuñ

zindagī ek Dagar par hī kahāñ chaltī hai

kabhī dīvār kabhī dil se lagāyā gayā huuñ

donoñ hāthoñ se luTāte hue ye to socheñ

kitnī mehnat se mohabbat se kamāyā gayā huuñ

maiñ na yūsuf huuñ na hai koī ḳharīdār mirā

jaane kyā soch ke bāzār meñ laayā gayā huuñ

imtihāñ dene talak yaad jinheñ rakhā jaa.e

un savālāt kī mānind bhulāyā gayā huuñ

nok-e-ḳhanjar se sahī vaqt ke hāthoñ lekin

gudgudī kar ke ka.ī baar hañsāyā gayā huuñ

is zamāne kā huuñ maiñ ek hañsī kā maqrūz

jis kī pādāsh meñ ik umr rulāyā gayā huuñ

mas.ala yuuñ hī nahīñ pesh fishār-e-ḳhūñ kā

ḳhud se uljhāyā gayā aur laḌāyā gayā huuñ

ajnabī log zamīñ-zād nahīñ lagte haiñ

aur sayyāre pe shāyad maiñ basāyā gayā huuñ

confucius ho ki nānak ho ki buddhā gautam

so tarīqoñ se sabaq ek paḌhāyā gayā huuñ

laakh pardoñ meñ sahī merī haqīqat malfūf

maiñ ba-har-rañg zamāne ko dikhāyā gayā huuñ

mujh ko māhaul muāfiq nahīñ aayā 'jāzib'

phuul huuñ aur sar-e-dasht khilāyā gayā huuñ

roz-e-awwal hi KHata-kar banaya gaya hun

aur phir ashraf-e-maKHluq bataya gaya hun

TuTne aur bikharne pe hai wawaila kyon

dekhiye kitni bulandi se giraya gaya hun

iKHtiyaraat se taqdir se kya lena hai

waqt ki gard mein tinka sa uDaya gaya hun

zindagi ek Dagar par hi kahan chalti hai

kabhi diwar kabhi dil se lagaya gaya hun

donon hathon se luTate hue ye to sochen

kitni mehnat se mohabbat se kamaya gaya hun

main na yusuf hun na hai koi KHaridar mera

jaane kya soch ke bazar mein laya gaya hun

imtihan dene talak yaad jinhen rakha jae

un sawalat ki manind bhulaya gaya hun

nok-e-KHanjar se sahi waqt ke hathon lekin

gudgudi kar ke kai bar hansaya gaya hun

is zamane ka hun main ek hansi ka maqruz

jis ki padash mein ek umr rulaya gaya hun

masala yun hi nahin pesh fishaar-e-KHun ka

KHud se uljhaya gaya aur laDaya gaya hun

ajnabi log zamin-zad nahin lagte hain

aur sayyare pe shayad main basaya gaya hun

confucius ho ki nanak ho ki buddha gautam

so tariqon se sabaq ek paDhaya gaya hun

lakh pardon mein sahi meri haqiqat malfuf

main ba-har-rang zamane ko dikhaya gaya hun

mujh ko mahaul muafiq nahin aaya 'jazib'

phul hun aur sar-e-dasht khilaya gaya hun