roz-e-maulud se sath apne hua gham paida

roz-e-maulūd se saath apne huā ġham paidā

lāla-sāñ daaġh uThāne ko hue ham paidā

huuñ maiñ vo naḳhl ki har shāḳh mirī aarā hai

huuñ maiñ vo shāḳh ki hoñ barg-e-tabardam paidā

maiñ jo rotā huuñ mire zaḳhm-e-jigar hañste haiñ

shādī o ġham se kyā hai mujh tauam paidā

chāhne vaale hazāroñ na.e maujūd hue

ḳhat ne us gul ke kiyā aur hī 'ālam paidā

dard sar meñ ho kisī ke to mire dil meñ ho dard

vāste mere huā hai ġham-e-ālam paidā

zaḳhm-e-ḳhandāñ haiñ ba-'ainih lab-e-ḳhandāñ apne

shādmānī meñ hai yaañ hālat-e-mātam paidā

āsmāñ shauq se talvāroñ kā meñh barsā de

mah-e-nau ne tire abrū kā kiyā ḳham paidā

kaam apnā na huā jab kajī-e-abrū se

gesū-e-yār hue darham-o-barham paidā

shub.h hotā hai sadaf kā mujhe har ġhunche par

kahīñ motī na kareñ qatra-e-shabnam paidā

chup raho duur karo muñh na mirā khulvāo

ġhāfilo zaḳhm-e-zabāñ kā nahīñ marham paidā

qulzum-e-fikr meñ har-chand lagā.e ġhote

dur-e-mazmūñ koī yāroñ se huā kam paidā

dost hī dushman-e-jāñ ho gayā apnā 'ātish'

nosh-dāroñ ne kiyā yaañ asar-e-sam paidā

roz-e-maulud se sath apne hua gham paida

lala-san dagh uThane ko hue hum paida

hun main wo naKHl ki har shaKH meri aara hai

hun main wo shaKH ki hon barg-e-tabardam paida

main jo rota hun mere zaKHm-e-jigar hanste hain

shadi o gham se kya hai mujh tauam paida

chahne wale hazaron nae maujud hue

KHat ne us gul ke kiya aur hi 'alam paida

dard sar mein ho kisi ke to mere dil mein ho dard

waste mere hua hai gham-e-alam paida

zaKHm-e-KHandan hain ba-'ainih lab-e-KHandan apne

shadmani mein hai yan haalat-e-matam paida

aasman shauq se talwaron ka meinh barsa de

mah-e-nau ne tere abru ka kiya KHam paida

kaam apna na hua jab kaji-e-abru se

gesu-e-yar hue darham-o-barham paida

shubh hota hai sadaf ka mujhe har ghunche par

kahin moti na karen qatra-e-shabnam paida

chup raho dur karo munh na mera khulwao

ghafilo zaKHm-e-zaban ka nahin marham paida

qulzum-e-fikr mein har-chand lagae ghote

dur-e-mazmun koi yaron se hua kam paida

dost hi dushman-e-jaan ho gaya apna 'atish'

nosh-daron ne kiya yan asar-e-sam paida