roz pani kahan mayassar hai

roz paanī kahāñ mayassar hai

zindagī ret kā samundar hai

kis qadar dil-fareb manzar hai

ek mīnār ik kabūtar hai

rāstoñ meñ sukūn paatā huuñ

merā ghar mere ghar ke bāhar hai

apnī muTThī to khol duuñ lekin

merī muTThī meñ ik muqaddar hai

taaza sūraj kī den hai yaaro

phuul ke haath meñ bhī patthar hai

roz yādoñ ke phuul khilte haiñ

mere āñgan meñ ik sanobar hai

jaise jāgīr mil ga.ī ho use

kis qadar ḳhush mujhe gañvā kar hai

aap 'tāriq' miyāñ se miliyegā

aadmī kyā hai ik qalandar hai

roz pani kahan mayassar hai

zindagi ret ka samundar hai

kis qadar dil-fareb manzar hai

ek minar ek kabutar hai

raston mein sukun pata hun

mera ghar mere ghar ke bahar hai

apni muTThi to khol dun lekin

meri muTThi mein ek muqaddar hai

taza suraj ki den hai yaro

phul ke hath mein bhi patthar hai

roz yaadon ke phul khilte hain

mere aangan mein ek sanobar hai

jaise jagir mil gai ho use

kis qadar KHush mujhe ganwa kar hai

aap 'tariq' miyan se miliyega

aadmi kya hai ek qalandar hai