rujua banda ki hai is tarah KHuda ki taraf

rujūa banda kī hai is tarah ḳhudā kī taraf

phire zamīr-e-ḳhabar jaise mubtadā kī taraf

ba.iid kyā hai muravvat se terī ai shah-e-husn

nigāh-e-lutf se dekhe jo tū gadā kī taraf

kahāñ vo zulf kahāñ ḳhūn-e-nāfa-e-āhū

jo mushk samjhe haiñ vo log haiñ ḳhatā kī taraf

ulajh ke shāne se khātā hai saikḌoñ jhaTke

qusūr se ye tire gesū-e-rasā kī taraf

ḳhudā ne dard-e-mohabbat atā kiyā hai jise

use tavajjoh-e-ḳhātir nahīñ davā kī taraf

malā jo tum ne lahū dast-o-pā meñ āshiq kā

na hogā mel tabī.at ko phir hinā kī taraf

karegā yaar mirī jañg-e-ġhair meñ imdād

jo āshnā haiñ vo hote haiñ āshnā kī taraf

firāq-e-yār meñ rahtā hai yuuñ tasavvur-e-gor

ḳhayāl jaise musāfir kā ho sarā kī taraf

na hogā ham-safar-e-rūh paikar-e-ḳhākī

ye sū-e-arz-e-ravāñ hogā vo samā kī taraf

bahut ḳharāb rahā but-kade meñ ai 'ātish'

ḳhudā-parast hai chal ḳhāna-e-ḳhudā kī taraf

rujua banda ki hai is tarah KHuda ki taraf

phire zamir-e-KHabar jaise mubtada ki taraf

baid kya hai murawwat se teri ai shah-e-husn

nigah-e-lutf se dekhe jo tu gada ki taraf

kahan wo zulf kahan KHun-e-nafa-e-ahu

jo mushk samjhe hain wo log hain KHata ki taraf

ulajh ke shane se khata hai saikDon jhaTke

qusur se ye tere gesu-e-rasa ki taraf

KHuda ne dard-e-mohabbat ata kiya hai jise

use tawajjoh-e-KHatir nahin dawa ki taraf

mala jo tum ne lahu dast-o-pa mein aashiq ka

na hoga mel tabiat ko phir hina ki taraf

karega yar meri jang-e-ghair mein imdad

jo aashna hain wo hote hain aashna ki taraf

firaq-e-yar mein rahta hai yun tasawwur-e-gor

KHayal jaise musafir ka ho sara ki taraf

na hoga ham-safar-e-ruh paikar-e-KHaki

ye su-e-arz-e-rawan hoga wo sama ki taraf

bahut KHarab raha but-kade mein ai 'atish'

KHuda-parast hai chal KHana-e-KHuda ki taraf