ruk gaya aankh se bahta hua dariya kaise

ruk gayā aañkh se bahtā huā dariyā kaise

ġham kā tūfāñ to bahut tez thā Thahrā kaise

har ghaḌī tere ḳhayāloñ meñ ghirā rahtā huuñ

milnā chāhūñ to milūñ ḳhud se maiñ tanhā kaise

mujh se jab tark-e-ta.alluq kā kiyā ahd to phir

muḌ ke merī hī taraf aap ne dekhā kaise

mujh ko ḳhud par bhī bharosā nahīñ hone paatā

log kar lete haiñ ġhairoñ pe bharosā kaise

dostoñ shukr karo mujh se mulāqāt huī

ye na pūchho ki luTī hai mirī duniyā kaise

dekhī hoñToñ kī hañsī zaḳhm na dekhe dil ke

aap duniyā kī taraf khā ga.e dhokā kaise

aap bhī ahl-e-ḳhirad ahl-e-junūñ the maujūd

luT ga.e ham bhī tirī bazm meñ tanhā kaise

is janam meñ to kabhī maiñ na udhar se guzrā

terī rāhoñ meñ mire naqsh-e-kaf-e-pā kaise

aañkh jis jā pe bhī paḌtī hai Thahar jaatī hai

likhnā chāhūñ to likhūñ terā sarāpā kaise

zulfeñ chehre se haTā lo ki haTā duuñ maiñ ḳhud

'nūr' ke hote hue itnā añdherā kaise

ruk gaya aankh se bahta hua dariya kaise

gham ka tufan to bahut tez tha Thahra kaise

har ghaDi tere KHayalon mein ghira rahta hun

milna chahun to milun KHud se main tanha kaise

mujh se jab tark-e-talluq ka kiya ahd to phir

muD ke meri hi taraf aap ne dekha kaise

mujh ko KHud par bhi bharosa nahin hone pata

log kar lete hain ghairon pe bharosa kaise

doston shukr karo mujh se mulaqat hui

ye na puchho ki luTi hai meri duniya kaise

dekhi honTon ki hansi zaKHm na dekhe dil ke

aap duniya ki taraf kha gae dhoka kaise

aap bhi ahl-e-KHirad ahl-e-junun the maujud

luT gae hum bhi teri bazm mein tanha kaise

is janam mein to kabhi main na udhar se guzra

teri rahon mein mere naqsh-e-kaf-e-pa kaise

aankh jis ja pe bhi paDti hai Thahar jati hai

likhna chahun to likhun tera sarapa kaise

zulfen chehre se haTa lo ki haTa dun main KHud

'nur' ke hote hue itna andhera kaise