ruKH-e-hayat hai sharminda-e-jamal bahut

ruḳh-e-hayāt hai sharminda-e-jamāl bahut

jamī huī hai abhī gard-e-māh-o-sāl bahut

gurez-pā hai jo mujh se tirā visāl to kyā

mirā junūñ bhī hai āmāda-e-zavāl bahut

mujhe har aan ye detā hai vasl kī lazzat

vafā-shanās hai tujh se tirā ḳhayāl bahut

kitāb-e-zīst ke har ik varaq pe raushan haiñ

ye terī farda-nigāhī ke ḳhadd-o-ḳhāl bahut

palaT ga.e jo parinde to phir gila kyā hai

har ek shāḳh-e-shajar par bichhe haiñ jaal bahut

tumheñ hai naaz agar apne husn-e-sarkash par

to merā 'ishq bhī hai rū-kash-e-jamāl bahut

azān-e-sub.h kī har lai kī taar TuuT ga.e

faroġh-e-zulmat-e-shab kā hai ye kamāl bahut

kisī bhī pyaas ke maare kī pyaas bujh na sakī

samundaroñ meñ to aate rahe uchhāl bahut

ruKH-e-hayat hai sharminda-e-jamal bahut

jami hui hai abhi gard-e-mah-o-sal bahut

gurez-pa hai jo mujh se tera visal to kya

mera junun bhi hai aamada-e-zawal bahut

mujhe har aan ye deta hai wasl ki lazzat

wafa-shanas hai tujh se tera KHayal bahut

kitab-e-zist ke har ek waraq pe raushan hain

ye teri farda-nigahi ke KHadd-o-KHal bahut

palaT gae jo parinde to phir gila kya hai

har ek shaKH-e-shajar par bichhe hain jal bahut

tumhein hai naz agar apne husn-e-sarkash par

to mera 'ishq bhi hai ru-kash-e-jamal bahut

azan-e-subh ki har lai ki tar TuT gae

farogh-e-zulmat-e-shab ka hai ye kamal bahut

kisi bhi pyas ke mare ki pyas bujh na saki

samundaron mein to aate rahe uchhaal bahut