ruKH-e-nigar se hai soz-e-jawidani-e-shama

ruḳh-e-nigār se hai soz-e-jāvidānī-e-sham.a

huī hai ātish-e-gul āb-e-zindagānī-e-sham.a

zabān-e-ahl-e-zabāñ meñ hai marg-e-ḳhāmoshī

ye baat bazm meñ raushan huī zabānī-e-sham.a

kare hai sarf ba-īmā-e-sho.ala qissa tamām

ba-tarz-e-ahl-e-fanā hai fasāna-ḳhvānī-e-sham.a

ġham us ko hasrat-e-parvāna kā hai ai sho.ale

tire larazne se zāhir hai nā-tavānī-e-sham.a

tire ḳhayāl se ruuh ehtizāz kartī hai

ba-jalva-rezi-e-bād-o-ba-par-fishānī-e-sham.a

nashāt-e-dāġh-e-ġham-e-ishq kī bahār na pūchh

shaguftagī hai shahīd-e-gul-e-ḳhizānī-e-sham.a

jale hai dekh ke bālīn-e-yār par mujh ko

na kyuuñ ho dil pe mire dāġh-e-bad-gumānī-e-sham.a

ruKH-e-nigar se hai soz-e-jawidani-e-shama

hui hai aatish-e-gul aab-e-zindagani-e-shama

zaban-e-ahl-e-zaban mein hai marg-e-KHamoshi

ye baat bazm mein raushan hui zabani-e-shama

kare hai sarf ba-ima-e-shoala qissa tamam

ba-tarz-e-ahl-e-fana hai fasana-KHwani-e-shama

gham us ko hasrat-e-parwana ka hai ai shoale

tere larazne se zahir hai na-tawani-e-shama

tere KHayal se ruh ehtizaz karti hai

ba-jalwa-rezi-e-baad-o-ba-par-fishani-e-shama

nashat-e-dagh-e-gham-e-ishq ki bahaar na puchh

shaguftagi hai shahid-e-gul-e-KHizani-e-shama

jale hai dekh ke baalin-e-yar par mujh ko

na kyun ho dil pe mere dagh-e-bad-gumani-e-shama