ruKH jo zer-e-sumbul-e-pur-pech-o-tab aa jaega

ruḳh jo zer-e-sumbul-e-pur-pech-o-tāb aa jā.egā

phir ke burj-e-sumbule meñ āftāb aa jā.egā

terā ehsāñ hogā qāsid gar shitāb aa jā.egā

sabr mujh ko dekh kar ḳhat kā javāb aa jā.egā

ho na betāb itnā gar us kā itaab aa jā.egā

tū ġhazab meñ ai dil-e-ḳhāna-ḳharāb aa jā.egā

is qadar ronā nahīñ behtar bas ab ashkoñ ko rok

varna tūfāñ dekh ai chashm-e-pur-āb aa jā.egā

pesh hovegā agar tere gunāhoñ kā hisāb

tañg zālim arsa-e-roz-e-hisāb aa jā.egā

dekh kar dast-e-sitam meñ terī teġh-e-ābdār

mere har zaḳhm-e-jigar ke muñh meñ aab aa jā.egā

apnī chashm-e-mast kī gardish na ai saaqī dikhā

dekh chakkar meñ abhī jām-e-sharāb aa jā.egā

ḳhuub hogā haañ jo siine se nikal jā.egā tū

chain mujh ko ai dil-e-pur-iztirāb aa jā.egā

ai 'zafar' uTh jā.egā jab parda-e-sharm-o-hijāb

sāmne vo yaar mere be-hijāb aa jā.egā

ruKH jo zer-e-sumbul-e-pur-pech-o-tab aa jaega

phir ke burj-e-sumbule mein aaftab aa jaega

tera ehsan hoga qasid gar shitab aa jaega

sabr mujh ko dekh kar KHat ka jawab aa jaega

ho na betab itna gar us ka itab aa jaega

tu ghazab mein ai dil-e-KHana-KHarab aa jaega

is qadar rona nahin behtar bas ab ashkon ko rok

warna tufan dekh ai chashm-e-pur-ab aa jaega

pesh howega agar tere gunahon ka hisab

tang zalim arsa-e-roz-e-hisab aa jaega

dekh kar dast-e-sitam mein teri tegh-e-abdar

mere har zaKHm-e-jigar ke munh mein aab aa jaega

apni chashm-e-mast ki gardish na ai saqi dikha

dekh chakkar mein abhi jam-e-sharab aa jaega

KHub hoga han jo sine se nikal jaega tu

chain mujh ko ai dil-e-pur-iztirab aa jaega

ai 'zafar' uTh jaega jab parda-e-sharm-o-hijab

samne wo yar mere be-hijab aa jaega