ruKH se parda uTha de zara saqiya bas abhi rang-e-mahfil badal jaega

ruḳh se parda uThā de zarā sāqiyā bas abhī rañg-e-mahfil badal jā.egā

hai jo behosh vo hosh meñ aa.egā girne vaalā hai jo vo sambhal jā.egā

log samjhe the ye inqilāb aate hī nazm-e-kohna chaman kā badal jā.egā

ye ḳhabar kis ko thī ātish-e-gul se hī tinkā tinkā nasheman kā jal jā.egā

tum tasallī na do sirf baiThe raho vaqt kuchh mere marne kā Tal jā.egā

kyā ye kam hai masīhā ke rahne hī se maut kā bhī irāda badal jā.egā

tiir kī jaañ hai dil dil kī jaañ tiir hai tiir ko yuuñ na khīñcho kahā maan lo

tiir khīñchā to dil bhī nikal aa.egā dil jo niklā to dam bhī nikal jā.egā

ek muddat huī us ko ro.e hue ek arsa huā muskurā.e hue

zabt-e-ġham kā ab aur us se va.ada na ho varna bīmār kā dam nikal jā.egā

apne parde kā rakhnā hai gar kuchh bharam sāmne aanā jaanā munāsib nahīñ

ek vahshī se ye chheḌ achchhī nahīñ kyā karoge agar ye machal jā.egā

apne va.ade kā ehsās hai to magar dekh kar tum ko aañsū umañD aa.e haiñ

aur agar tum ko ye bhī gavārā nahīñ abr barse baġhair ab nikal jā.egā

merā dāman to jal hī chukā hai magar aañch tum par bhī aa.e gavārā nahīñ

mere aañsū na poñchho ḳhudā ke liye varna dāman tumhārā bhī jal jā.egā

dil meñ taaza ġham-e-āshiyāñ hai abhī mere nāloñ se barham na sayyād ho

dhīre dhīre ye aañsū bhī tham jā.eñge rafta rafta ye dil bhī bahal jā.egā

merī fariyād se vo taḌap jā.eñge mere dil ko malāl is kā hogā magar

kyā ye kam hai ki vo be-naqāb ā.eñge marne vaale kā armāñ nikal jā.egā

phuul kuchh is tarah toḌ de bāġhbāñ shāḳh hilne na paa.e na āvāz ho

varna gulshan pe raunaq na phir aa.egī dil agar har kisī kā dahal jā.egā

us ke hañsne meñ rone kā andāz hai ḳhaak uḌāne meñ fariyād kā raaz hai

us ko chheḌo na 'anvar' ḳhudā ke liye varna bīmār kā dam nikal jā.egā

ruKH se parda uTha de zara saqiya bas abhi rang-e-mahfil badal jaega

hai jo behosh wo hosh mein aaega girne wala hai jo wo sambhal jaega

log samjhe the ye inqilab aate hi nazm-e-kohna chaman ka badal jaega

ye KHabar kis ko thi aatish-e-gul se hi tinka tinka nasheman ka jal jaega

tum tasalli na do sirf baiThe raho waqt kuchh mere marne ka Tal jaega

kya ye kam hai masiha ke rahne hi se maut ka bhi irada badal jaega

tir ki jaan hai dil dil ki jaan tir hai tir ko yun na khincho kaha man lo

tir khincha to dil bhi nikal aaega dil jo nikla to dam bhi nikal jaega

ek muddat hui us ko roe hue ek arsa hua muskurae hue

zabt-e-gham ka ab aur us se wada na ho warna bimar ka dam nikal jaega

apne parde ka rakhna hai gar kuchh bharam samne aana jaana munasib nahin

ek wahshi se ye chheD achchhi nahin kya karoge agar ye machal jaega

apne wade ka ehsas hai to magar dekh kar tum ko aansu umanD aae hain

aur agar tum ko ye bhi gawara nahin abr barse baghair ab nikal jaega

mera daman to jal hi chuka hai magar aanch tum par bhi aae gawara nahin

mere aansu na ponchho KHuda ke liye warna daman tumhaara bhi jal jaega

dil mein taza gham-e-ashiyan hai abhi mere nalon se barham na sayyaad ho

dhire dhire ye aansu bhi tham jaenge rafta rafta ye dil bhi bahal jaega

meri fariyaad se wo taDap jaenge mere dil ko malal is ka hoga magar

kya ye kam hai ki wo be-naqab aaenge marne wale ka arman nikal jaega

phul kuchh is tarah toD de baghban shaKH hilne na pae na aawaz ho

warna gulshan pe raunaq na phir aaegi dil agar har kisi ka dahal jaega

us ke hansne mein rone ka andaz hai KHak uDane mein fariyaad ka raaz hai

us ko chheDo na 'anwar' KHuda ke liye warna bimar ka dam nikal jaega