ruKH tumhaara ho jidhar hum bhi udhar ho jaenge

ruḳh tumhārā ho jidhar ham bhī udhar ho jā.eñge

tum se bichhḌeñge agar to dar-ba-dar ho jā.eñge

zindagānī ke safar meñ lutf hogā tab nasīb

ham-ḳhayāl-o-ham-navā jab ham-safar ho jā.eñge

āsmānoñ kā safar ham tai kareñge ek roz

jab hamāre hausloñ meñ bāl-o-par ho jā.eñge

sādgī yūñhī agar laade rahe to ek din

sab tumhāre apne tum se be-ḳhabar ho jā.eñge

dekhnā jis din unheñ maqsad samajh meñ aa.egā

manziloñ kī justujū meñ rahguzar ho jā.eñge

paude haiñ urdu adab ke āb-o-dāna Dāliye

aane vaale kal meñ saa.e aur samar ho jā.eñge

saaqī sāġhar kī zarūrat hī kahāñ mere liye

terī āñkhoñ ke hī pyāle pur-asar ho jā.eñge

vo na jā.eñge kabhī 'mahtāb' zulmat kī taraf

vaqt par anjām se vāqif agar ho jā.eñge

ruKH tumhaara ho jidhar hum bhi udhar ho jaenge

tum se bichhDenge agar to dar-ba-dar ho jaenge

zindagani ke safar mein lutf hoga tab nasib

ham-KHayal-o-ham-nawa jab ham-safar ho jaenge

aasmanon ka safar hum tai karenge ek roz

jab hamare hauslon mein baal-o-par ho jaenge

sadgi yunhi agar lade rahe to ek din

sab tumhaare apne tum se be-KHabar ho jaenge

dekhna jis din unhen maqsad samajh mein aaega

manzilon ki justuju mein rahguzar ho jaenge

paude hain urdu adab ke aab-o-dana Daliye

aane wale kal mein sae aur samar ho jaenge

saqi saghar ki zarurat hi kahan mere liye

teri aankhon ke hi pyale pur-asar ho jaenge

wo na jaenge kabhi 'mahtab' zulmat ki taraf

waqt par anjam se waqif agar ho jaenge