rut suhani hai uski aankhon mein

rut suhānī hai us kī āñkhoñ meñ

raat raanī hai us kī āñkhoñ meñ

dil kī ḳhvāhish hai Duub marne kī

itnā paanī hai us kī āñkhoñ meñ

dekh bhar le to khil uThe gulshan

vo javānī hai us kī āñkhoñ meñ

ishq jo jāvedānī hotā hai

jāvedānī hai us kī āñkhoñ meñ

hiir rāñjhe ko jis meñ jiinā hai

vo kahānī hai us kī āñkhoñ meñ

nau-shagufta anaar kā buuTā

zāfrānī hai us kī āñkhoñ meñ

ik ishāre pe chal paḌe duniyā

vo ravānī hai us kī āñkhoñ meñ

laakh ho shahr ḳhushbuoñ vaale

rājdhānī hai us kī āñkhoñ meñ

ik hai behad zahīn sī laḌkī

ik divānī hai us kī āñkhoñ meñ

hai agar lafz-e-zindagī mushkil

to ma.ānī haiñ us kī āñkhoñ meñ

rut suhani hai us ki aankhon mein

raat rani hai us ki aankhon mein

dil ki KHwahish hai Dub marne ki

itna pani hai us ki aankhon mein

dekh bhar le to khil uThe gulshan

wo jawani hai us ki aankhon mein

ishq jo jawedani hota hai

jawedani hai us ki aankhon mein

hir ranjhe ko jis mein jina hai

wo kahani hai us ki aankhon mein

nau-shagufta anar ka buTa

zafrani hai us ki aankhon mein

ek ishaare pe chal paDe duniya

wo rawani hai us ki aankhon mein

lakh ho shahr KHushbuon wale

rajdhani hai us ki aankhon mein

ek hai behad zahin si laDki

ek diwani hai us ki aankhon mein

hai agar lafz-e-zindagi mushkil

to maani hain us ki aankhon mein