ru bhi aks-e-ru bhi main

rū bhī aks-e-rū bhī maiñ

maiñ bhī maiñ huuñ tū bhī maiñ

ḳhud se bach kar jā.ūñ kahāñ

huuñ goyā har sū bhī maiñ

le kar ruḳh par itne kalañk

lagtā huuñ ḳhush-rū bhī maiñ

shāmil-e-mai paimāna bhar

piitā huuñ aañsū bhī maiñ

sadqe maiñ un āñkhoñ ke

siikh gayā jaadū bhī maiñ

us kī bazm-e-nāz se duur

us ke ham-pahlū bhī maiñ

diid se be-parvā ho kar

shauq se be-qābū bhī maiñ

bair hī rakhtā mujh se sanam

hotā gar hindū bhī maiñ

vaa.e tilism-e-naqsh-e-farañg

bhuul gayā urdu bhī maiñ

qaa.el ḳhud bhī huuñ 'haqqī'

shāġhil-e-illā-hū bhī maiñ

ru bhi aks-e-ru bhi main

main bhi main hun tu bhi main

KHud se bach kar jaun kahan

hun goya har su bhi main

le kar ruKH par itne kalank

lagta hun KHush-ru bhi main

shamil-e-mai paimana bhar

pita hun aansu bhi main

sadqe main un aankhon ke

sikh gaya jadu bhi main

us ki bazm-e-naz se dur

us ke ham-pahlu bhi main

did se be-parwa ho kar

shauq se be-qabu bhi main

bair hi rakhta mujh se sanam

hota gar hindu bhi main

wae tilism-e-naqsh-e-farang

bhul gaya urdu bhi main

qael KHud bhi hun 'haqqi'

shaghil-e-illa-hu bhi main