ru-e-gul chehra-e-mahtab nahin dekhte hain

rū-e-gul chehra-e-mahtāb nahīñ dekhte haiñ

ham tirī tarah koī ḳhvāb nahīñ dekhte haiñ

sīna-e-mauj pe kashtī ko ravāñ rakhte haiñ

gird apne koī gardāb nahīñ dekhte haiñ

tishnagī meñ bhī vo pāband-e-qanā.at haiñ ki ham

bhuul kar bhī taraf-e-āb nahīñ dekhte haiñ

sar bhī maujūd haiñ shamshīr-e-sitam bhī maujūd

shahr meñ ḳhuun kā sailāb nahīñ dekhte haiñ

aa ga.e haiñ ye mire shahr meñ kis shahr ke log

guftugū meñ adab-ādāb nahīñ dekhte haiñ

aanā jaanā unhīñ galiyoñ meñ abhī tak hai magar

ab vahāñ majma-e-ahbāb nahīñ dekhte haiñ

kis chaman meñ haiñ ki mausam to guloñ kā hai magar

ek bhī shāḳh ko shādāb nahīñ dekhte haiñ

is pe hairāñ haiñ ḳharīdār ki qīmat hai bahut

mere gauhar kī tab-o-tāb nahīñ dekhte haiñ

ho ga.e saare balā-ḳhez samundar pāyāb

ab safīna koī ġharqāb nahīñ dekhte haiñ

ru-e-gul chehra-e-mahtab nahin dekhte hain

hum teri tarah koi KHwab nahin dekhte hain

sina-e-mauj pe kashti ko rawan rakhte hain

gird apne koi gardab nahin dekhte hain

tishnagi mein bhi wo paband-e-qanaat hain ki hum

bhul kar bhi taraf-e-ab nahin dekhte hain

sar bhi maujud hain shamshir-e-sitam bhi maujud

shahr mein KHun ka sailab nahin dekhte hain

aa gae hain ye mere shahr mein kis shahr ke log

guftugu mein adab-adab nahin dekhte hain

aana jaana unhin galiyon mein abhi tak hai magar

ab wahan majma-e-ahbab nahin dekhte hain

kis chaman mein hain ki mausam to gulon ka hai magar

ek bhi shaKH ko shadab nahin dekhte hain

is pe hairan hain KHaridar ki qimat hai bahut

mere gauhar ki tab-o-tab nahin dekhte hain

ho gae sare bala-KHez samundar payab

ab safina koi gharqab nahin dekhte hain