rudad-e-jaan kahen jo zara dam mile hamein

rūdād-e-jāñ kaheñ jo zarā dam mile hameñ

us dil ke rāste meñ ka.ī ḳham mile hameñ

labbaik pahle ham ne kahā thā rasūl-e-husn

ho kār-zār-e-ishq to parcham mile hameñ

aa.e ik aisā zaḳhm jo bharnā na ho kabhī

ya.anī har ek zaḳhm kā marham mile hameñ

din meñ jahāñ sarāb mile the hameñ vahāñ

aa.ī jo raat qatra-e-shabnam mile hameñ

tum jaise aur log bhī hoñge jahān meñ

ye baat aur hai ki bahut kam mile hameñ

jab saath the to mil ke bhī milnā na ho sakā

jab se bichhaḌ ga.e ho to paiham mile hameñ

aur phir hameñ bhī ḳhud pe bahut pyaar aa gayā

us kī taraf khaḌe hue jab ham mile hameñ

jo umr-bhar kā saath nibhātā na mil sakā

vaise to zindagī meñ bahut ġham mile hameñ

rudad-e-jaan kahen jo zara dam mile hamein

us dil ke raste mein kai KHam mile hamein

labbaik pahle hum ne kaha tha rasul-e-husn

ho kar-zar-e-ishq to parcham mile hamein

aae ek aisa zaKHm jo bharna na ho kabhi

yani har ek zaKHm ka marham mile hamein

din mein jahan sarab mile the hamein wahan

aai jo raat qatra-e-shabnam mile hamein

tum jaise aur log bhi honge jahan mein

ye baat aur hai ki bahut kam mile hamein

jab sath the to mil ke bhi milna na ho saka

jab se bichhaD gae ho to paiham mile hamein

aur phir hamein bhi KHud pe bahut pyar aa gaya

us ki taraf khaDe hue jab hum mile hamein

jo umr-bhar ka sath nibhata na mil saka

waise to zindagi mein bahut gham mile hamein