ruh ke malbe se lipTe nam ka andaza na kar

ruuh ke malbe se lipTe nam kā andāza na kar

mujh se mil to mere pahle ġham kā andāza na kar

varna merī ret ḳhud meñ jazb kar legī tujhe

sarsarī sahrā ke pech-o-ḳham kā andāza na kar

dhuup kī TuuTī huī taḳhtī pe bārish ne likhā

ghar ke andar baiTh kar mausam kā andāza na kar

ai havā-e-tāza aglī manziloñ kī samt dekh

mujh meñ phaile habs ke aalam kā andāza na kar

bad-samā.at shaḳhs ye sab terī vus.at meñ kahāñ

sāz-e-jāñ kī larzish-e-paiham kā andāza na kar

sair kar sarv-o-saman ke darmiyāñ ai gul-nazhād

āhū-e-vahshat-zada ke ram kā andāza na kar

yuuñ na ho āñkheñ tirī patthar kī ho jaa.eñ 'nabīl'

is sadī ke qissa-e-ādam kā andāza na kar

ruh ke malbe se lipTe nam ka andaza na kar

mujh se mil to mere pahle gham ka andaza na kar

warna meri ret KHud mein jazb kar legi tujhe

sarsari sahra ke pech-o-KHam ka andaza na kar

dhup ki TuTi hui taKHti pe barish ne likha

ghar ke andar baiTh kar mausam ka andaza na kar

ai hawa-e-taza agli manzilon ki samt dekh

mujh mein phaile habs ke aalam ka andaza na kar

bad-samaat shaKHs ye sab teri wusat mein kahan

saz-e-jaan ki larzish-e-paiham ka andaza na kar

sair kar sarw-o-saman ke darmiyan ai gul-nazhad

aahu-e-wahshat-zada ke ram ka andaza na kar

yun na ho aankhen teri patthar ki ho jaen 'nabil'

is sadi ke qissa-e-adam ka andaza na kar