ruTh kar aankh ke andar se nikal jate hain

ruuTh kar aañkh ke andar se nikal jaate haiñ

ashk bachchoñ kī tarah ghar se nikal jaate haiñ

sabz peḌoñ ko pata tak nahīñ chaltā shāyad

zard patte bhare manzar se nikal jaate haiñ

is guzargāh-e-mohabbat meñ kahāñ aa gayā maiñ

dost chup-chāp barābar se nikal jaate haiñ

tum tarāshe hue but ho kisī mehrāb ke biich

ham zavā.ed haiñ jo patthar se nikal jaate haiñ

sāhilī ret meñ kyā aisī kashish hai ki guhar

siip meñ band samundar se nikal jaate haiñ

maiñ tire hijr se niklūñgā to mar jā.ūñgā

haa.e vo log jo mehvar se nikal jaate haiñ

āḳhirash sub.h-e-qayāmat kī azaañ aatī hai

aur ham shaam ke lashkar se nikal jaate haiñ

ruTh kar aankh ke andar se nikal jate hain

ashk bachchon ki tarah ghar se nikal jate hain

sabz peDon ko pata tak nahin chalta shayad

zard patte bhare manzar se nikal jate hain

is guzargah-e-mohabbat mein kahan aa gaya main

dost chup-chap barabar se nikal jate hain

tum tarashe hue but ho kisi mehrab ke bich

hum zawaed hain jo patthar se nikal jate hain

sahili ret mein kya aisi kashish hai ki guhar

sip mein band samundar se nikal jate hain

main tere hijr se niklunga to mar jaunga

hae wo log jo mehwar se nikal jate hain

aaKHirash subh-e-qayamat ki azan aati hai

aur hum sham ke lashkar se nikal jate hain