ruTha tha tujhse yani KHud apni KHushi se main

rūThā thā tujh se ya.anī ḳhud apnī ḳhushī se maiñ

phir us ke ba.ad jaan na rūThā kisī se maiñ

bāñhoñ se merī vo abhī ruḳhsat nahīñ huā

par gum huuñ intizār meñ us ke abhī se maiñ

dam-bhar tirī havas se nahīñ hai mujhe qarār

halkān ho gayā huuñ tirī dilkashī se maiñ

is taur se huā thā judā apnī jaan se

jaise bhulā sakūñgā use aaj hī se maiñ

ai tarah-dār-e-ishva-tarāz-e-dayār-e-nāz

ruḳhsat huā huuñ tere liye dil-galī se maiñ

tū hī harīm-e-jalva hai hañgām-e-rañg hai

jānāñ bahut udaas huuñ apnī kamī se maiñ

kuchh to hisāb chāhiye ā.īne se tujhe

lūñgā tirā hisāb mirī jaañ tujhī se maiñ

ruTha tha tujh se yani KHud apni KHushi se main

phir us ke baad jaan na ruTha kisi se main

banhon se meri wo abhi ruKHsat nahin hua

par gum hun intizar mein us ke abhi se main

dam-bhar teri hawas se nahin hai mujhe qarar

halkan ho gaya hun teri dilkashi se main

is taur se hua tha juda apni jaan se

jaise bhula sakunga use aaj hi se main

ai tarah-dar-e-ishwa-taraaz-e-dayar-e-naz

ruKHsat hua hun tere liye dil-gali se main

tu hi harim-e-jalwa hai hangam-e-rang hai

jaanan bahut udas hun apni kami se main

kuchh to hisab chahiye aaine se tujhe

lunga tera hisab meri jaan tujhi se main