sabit ye main karunga ki hun ya nahin hun main

sābit ye maiñ karūñgā ki huuñ yā nahīñ huuñ maiñ

vahm o yaqīñ kā koī do-rāhā nahīñ huuñ maiñ

sustā rahā huuñ rāhguzar se zarā pare

kyā mujh ko tak rahe ho tamāsha nahīñ huuñ maiñ

pahlā qadam kahīñ mire inkār kā na ho

honā thā jis jagah mujhe us jā nahīñ huuñ maiñ

baisākhiyoñ pe chalte bano muñh na tum lago

kahtā huuñ phir ki aadmī achchhā nahīñ huuñ maiñ

huuñ apne daa.eñ baa.eñ bhī maiñ hī ye soch lo

tum ho to merī taak meñ tanhā nahīñ huuñ maiñ

samjhe na koī sarsarī sā tazkira mujhe

bhar-pūr mājrā huuñ havāla nahīñ huuñ maiñ

hairat-kada huuñ vo ki jise lā-makāñ kaheñ

tum kyā samajh rahe ho mujhe kyā nahīñ huuñ maiñ

ye mujh ko sochnā hai ki aglā qadam ho kyā

yuuñ bhī kisī kī baat meñ aayā nahīñ huuñ maiñ

kahtā hai 'talḳh' ghar se nikalnā karūñgā band

koī bachā hai jis se ki uljhā nahīñ huuñ maiñ

sabit ye main karunga ki hun ya nahin hun main

wahm o yaqin ka koi do-raha nahin hun main

susta raha hun rahguzar se zara pare

kya mujh ko tak rahe ho tamasha nahin hun main

pahla qadam kahin mere inkar ka na ho

hona tha jis jagah mujhe us ja nahin hun main

baisakhiyon pe chalte bano munh na tum lago

kahta hun phir ki aadmi achchha nahin hun main

hun apne daen baen bhi main hi ye soch lo

tum ho to meri tak mein tanha nahin hun main

samjhe na koi sarsari sa tazkira mujhe

bhar-pur majra hun hawala nahin hun main

hairat-kada hun wo ki jise la-makan kahen

tum kya samajh rahe ho mujhe kya nahin hun main

ye mujh ko sochna hai ki agla qadam ho kya

yun bhi kisi ki baat mein aaya nahin hun main

kahta hai 'talKH' ghar se nikalna karunga band

koi bacha hai jis se ki uljha nahin hun main