saf kahte ho magar kuchh nahin khulta kahna

saaf kahte ho magar kuchh nahīñ khultā kahnā

baat kahnā bhī tumhārā hai muammā kahnā

ro ke us shoḳh se qāsid mirā ronā kahnā

hañs paḌe us pe to phir harf-e-tamannā kahnā

misl-e-maktūb na kahne meñ hai kyā kyā kahnā

na mirī tarz-e-ḳhamoshī na kisī kā kahnā

aur thoḌī sī shab-e-vasl baḌhā de yā-rab

sub.h nazdīk hameñ un se hai kyā kyā kahnā

phaaḌ khātā hai jo ġhairoñ ko jhapaT kar sag-e-yār

maiñ ye kahtā huuñ mire sher tirā kyā kahnā

har bun-e-mū-e-mizha meñ haiñ yahāñ sau tūfāñ

ain ġhaflat hai marī aañkh ko dariyā kahnā

vasf-e-ruḳh meñ jo sune sher vo hañs kar bole

sher haiñ nuur ke hai nuur kā terā kahnā

lā sakoge na zarā jalva-e-dīdār kī taab

arinī muñh se na ai hazrat-e-mūsā kahnā

kar liyā ahd kabhī kuchh na kaheñge muñh se

ab agar sach bhī kaheñ tum hameñ jhūTā kahnā

ḳhaak meñ zid se milāo na mire aañsū ko

sachche motī ko munāsib nahīñ jhūTā kahnā

kaise nādāñ haiñ jo achchhoñ ko burā kahte haiñ

ho burā bhī to use chāhiye achchhā kahnā

dam-e-āḳhir tū buto yaad ḳhudā karne do

zindagī bhar to kiyā maiñ ne tumhārā kahnā

paḌhte haiñ dekh ke us but ko farishte bhī darūd

marhabā salle-alā salle-alā kyā kahnā

ai buto tum jo adā aa ke karo masjid meñ

lab-e-mehrāb kahe nām-e-ḳhudā kyā kahnā

in hasīnoñ kī jo tārīf karo chiḌhte haiñ

sach to ye hai ki burā hai unheñ achchhā kahnā

shauq ka.abe liye jaatā hai havas jānib-e-dair

mere allāh bajā lā.ūñ meñ kis kā kahnā

saarī mahfil ko ishāroñ meñ luTā do ai jaan

siikh lo chashm-e-suḳhan-go se latīfa kahnā

ghaTte ghaTte meñ rahā ishq-e-kamar meñ aadhā

jāma-e-tan ko mire chāhiye niimā kahnā

meñ to āñkhoñ se bajā laatā huuñ irshād-e-huzūr

aap sunte nahīñ kānoñ se bhī merā kahnā

chustī-e-tab.a se ustād kā hai qaul 'amīr'

ho zamīñ sust magar chāhiye achchhā kahnā

saf kahte ho magar kuchh nahin khulta kahna

baat kahna bhi tumhaara hai muamma kahna

ro ke us shoKH se qasid mera rona kahna

hans paDe us pe to phir harf-e-tamanna kahna

misl-e-maktub na kahne mein hai kya kya kahna

na meri tarz-e-KHamoshi na kisi ka kahna

aur thoDi si shab-e-wasl baDha de ya-rab

subh nazdik hamein un se hai kya kya kahna

phaD khata hai jo ghairon ko jhapaT kar sag-e-yar

main ye kahta hun mere sher tera kya kahna

har bun-e-mu-e-mizha mein hain yahan sau tufan

ain ghaflat hai mari aankh ko dariya kahna

wasf-e-ruKH mein jo sune sher wo hans kar bole

sher hain nur ke hai nur ka tera kahna

la sakoge na zara jalwa-e-didar ki tab

arini munh se na ai hazrat-e-musa kahna

kar liya ahd kabhi kuchh na kahenge munh se

ab agar sach bhi kahen tum hamein jhuTa kahna

KHak mein zid se milao na mere aansu ko

sachche moti ko munasib nahin jhuTa kahna

kaise nadan hain jo achchhon ko bura kahte hain

ho bura bhi to use chahiye achchha kahna

dam-e-aKHir tu buto yaad KHuda karne do

zindagi bhar to kiya main ne tumhaara kahna

paDhte hain dekh ke us but ko farishte bhi darud

marhaba salle-ala salle-ala kya kahna

ai buto tum jo ada aa ke karo masjid mein

lab-e-mehrab kahe nam-e-KHuda kya kahna

in hasinon ki jo tarif karo chiDhte hain

sach to ye hai ki bura hai unhen achchha kahna

shauq kabe liye jata hai hawas jaanib-e-dair

mere allah baja laun mein kis ka kahna

sari mahfil ko ishaaron mein luTa do ai jaan

sikh lo chashm-e-suKHan-go se latifa kahna

ghaTte ghaTte mein raha ishq-e-kamar mein aadha

jama-e-tan ko mere chahiye nima kahna

mein to aankhon se baja lata hun irshad-e-huzur

aap sunte nahin kanon se bhi mera kahna

chusti-e-taba se ustad ka hai qaul 'amir'

ho zamin sust magar chahiye achchha kahna