salim yaqin-e-azmat-e-sehr-e-KHuda na toD

sālim yaqīn-e-azmat-e-sehr-e-ḳhudā na toḌ

māyūs ho ke kāsa-e-dast-e-duā na toḌ

shīrāza-e-hayāt bikhar jā.egā mirā

ai sañg-zād shīsha-e-ahd-e-vafā na toḌ

kuchh aur hone de rah-e-manzil ko tez-gām

ai ḳhizr tū abhī mirī zanjīr-e-pā na toḌ

teshe kī zarb sah nahīñ saktā har ik vajūd

aazar har ek paikar-e-sañg-e-anā na toḌ

chehre kī silvaToñ kā sabab aa.ina nahīñ

nāchārgī-e-umr-e-ruḳh-e-ā.ina na toḌ

is mutrib-e-hayāt meñ zinda hai rāgnī

ruk mutriba abhī tū ye sāz-e-sadā na toḌ

bedār ho na jaa.eñ badan kī zarūrateñ

ai shauq-e-be-panāh fasīl-e-hayā na toḌ

'sālim'-shujā.a maut kī hai aarzū harām

ā.īna-e-hayāt ko yuuñ be-ḳhatā na toḌ

salim yaqin-e-azmat-e-sehr-e-KHuda na toD

mayus ho ke kasa-e-dast-e-dua na toD

shiraaza-e-hayat bikhar jaega mera

ai sang-zad shisha-e-ahd-e-wafa na toD

kuchh aur hone de rah-e-manzil ko tez-gam

ai KHizr tu abhi meri zanjir-e-pa na toD

teshe ki zarb sah nahin sakta har ek wajud

aazar har ek paikar-e-sang-e-ana na toD

chehre ki silwaTon ka sabab aaina nahin

nachaargi-e-umr-e-ruKH-e-aina na toD

is mutrib-e-hayat mein zinda hai ragni

ruk mutriba abhi tu ye saz-e-sada na toD

bedar ho na jaen badan ki zaruraten

ai shauq-e-be-panah fasil-e-haya na toD

'salim'-shujaa maut ki hai aarzu haram

aaina-e-hayat ko yun be-KHata na toD