samna zindagi ka kar to sahi

sāmnā zindagī kā kar to sahī

tap ke us aag meñ nikhar to sahī

zulm se aañkh chaar kar to sahī

ho na jaa.e ye be-asar to sahī

daulat-e-umr-e-jāvedāñ mil jaa.e

tū ba-nām-e-hayāt mar to sahī

terī tasvīr bol uTThegī

merī āñkhoñ kā rang bhar to sahī

sāhil-e-bahr meñ kahāñ gauhar

zarā gahrā.ī meñ utar to sahī

haq-o-bātil agar samajhnā hai

pastī-e-fikr se ubhar to sahī

aable phuul ban ke mahkeñge

rāh-e-pur-ḳhār se guzar to sahī

dekh kitnī latīf dhaḌkan hai

qalb-e-gītī pe haath dhar to sahī

zindagī kitnī ḳhūbsūrat hai

zindagī par nigāh kar to sahī

paas apne koī sipar bhī nahīñ

vaqt achchhā hai vaar kar to sahī

samna zindagi ka kar to sahi

tap ke us aag mein nikhar to sahi

zulm se aankh chaar kar to sahi

ho na jae ye be-asar to sahi

daulat-e-umr-e-jawedan mil jae

tu ba-nam-e-hayat mar to sahi

teri taswir bol uTThegi

meri aankhon ka rang bhar to sahi

sahil-e-bahr mein kahan gauhar

zara gahrai mein utar to sahi

haq-o-baatil agar samajhna hai

pasti-e-fikr se ubhar to sahi

aable phul ban ke mahkenge

rah-e-pur-KHar se guzar to sahi

dekh kitni latif dhaDkan hai

qalb-e-giti pe hath dhar to sahi

zindagi kitni KHubsurat hai

zindagi par nigah kar to sahi

pas apne koi sipar bhi nahin

waqt achchha hai war kar to sahi