samne aankhon ke har dam teri timsal hai aaj

sāmne āñkhoñ ke har dam tirī timsāl hai aaj

dil bharā aa.e na kyūñkar ki burā haal hai aaj

za.afarāñ-zār meñ laale kī bahār aa kar dekh

ashk-e-ḳhūnīñ se ruḳh-e-zard mirā laal hai aaj

vaqt hai gar to ba-taqrīb-e-iyādat aave

kyūñki bīmār kā tere batar ahvāl hai aaj

turfa hālat hai ki uTh kar maiñ jahāñ jaatā huuñ

tere dīdār kī ḳhvāhish mire dumbāl hai aaj

roz is tuul se kaahe ko kaTe thā merā

nahīñ ma.alūm mujhe roz hai yā saal hai aaj

dil chalā sabr chalā jī bhī chalā jaatā hai

Tuk madad kar tū ki lashkar meñ mire chaal hai aaj

tujh ko chāhā thā maiñ us din ke liye kyā zālim

terī chāhat to mirī jaan kā janjāl hai aaj

din judā.ī kā qayāmat se nahīñ kam har-chand

bīm-e-pursish na ġham-e-nāma-e-āmāl hai aaj

'mus.hafī' karvaTeñ badle hai qalaq meñ tujh bin

ustuḳhvāñ us kā jo hai qur.a-e-rummāl hai aaj

samne aankhon ke har dam teri timsal hai aaj

dil bhara aae na kyunkar ki bura haal hai aaj

zafaran-zar mein lale ki bahaar aa kar dekh

ashk-e-KHunin se ruKH-e-zard mera lal hai aaj

waqt hai gar to ba-taqrib-e-iyaadat aawe

kyunki bimar ka tere batar ahwal hai aaj

turfa haalat hai ki uTh kar main jahan jata hun

tere didar ki KHwahish mere dumbaal hai aaj

roz is tul se kahe ko kaTe tha mera

nahin malum mujhe roz hai ya sal hai aaj

dil chala sabr chala ji bhi chala jata hai

Tuk madad kar tu ki lashkar mein mere chaal hai aaj

tujh ko chaha tha main us din ke liye kya zalim

teri chahat to meri jaan ka janjal hai aaj

din judai ka qayamat se nahin kam har-chand

bim-e-pursish na gham-e-nama-e-amal hai aaj

'mushafi' karwaTen badle hai qalaq mein tujh bin

ustuKHwan us ka jo hai qura-e-rummal hai aaj