samne kis ki gali hai dekho

sāmne kis kī galī hai dekho

sar ke bal ḳhalq chalī hai dekho

chiTThī Daalī to hai us shoḳh ke naam

naav kāġhaz kī chalī hai dekho

yuuñ taġhāful se na maslo dil ko

ye kalī nāzoñ palī hai dekho

merī bālīñ se na uTh kar jaao

lo mirī nabz chalī hai dekho

us shakar-lab kī zabāñ kyā kahiye

muñh meñ misrī kī Dalī hai dekho

maanā jalne ko hai parvāna bhī

pahle to sham' jalī hai dekho

raaz khilne kā na kholo is par

ye abhī band kalī hai dekho

'āshiqoñ chalnā hai ab sar ke bal

sāmne kis kī galī hai dekho

hijr ko vasl pe de kar tarjīh

ham ne kyā chaal chalī hai dekho

zāhido muuñd ke āñkheñ uḌ jaa.e

chashm-e-maigūñ kī Dhalī hai dekho

āḳhirash barq-e-nazar kī zad meñ

shāḳh-e-ummīd phalī hai dekho

kis ko mā'lūm 'amar' kī sīrat

shakl to changī bhalī hai dekho

samne kis ki gali hai dekho

sar ke bal KHalq chali hai dekho

chiTThi Dali to hai us shoKH ke nam

naw kaghaz ki chali hai dekho

yun taghaful se na maslo dil ko

ye kali nazon pali hai dekho

meri baalin se na uTh kar jao

lo meri nabz chali hai dekho

us shakar-lab ki zaban kya kahiye

munh mein misri ki Dali hai dekho

mana jalne ko hai parwana bhi

pahle to sham' jali hai dekho

raaz khilne ka na kholo is par

ye abhi band kali hai dekho

'ashiqon chalna hai ab sar ke bal

samne kis ki gali hai dekho

hijr ko wasl pe de kar tarjih

hum ne kya chaal chali hai dekho

zahido mund ke aankhen uD jae

chashm-e-maigun ki Dhali hai dekho

aaKHirash barq-e-nazar ki zad mein

shaKH-e-ummid phali hai dekho

kis ko ma'lum 'amar' ki sirat

shakl to changi bhali hai dekho