samne un ke taDap kar is tarah fariyaad ki

sāmne un ke taḌap kar is tarah fariyād kī

maiñ ne puurī shakl dikhlā dī dil-e-nāshād kī

ab yahī hai vaj.h-e-taskīñ ḳhātir-e-nāshād kī

zindagī maiñ ne dayār-e-husn meñ barbād kī

hosh par bijlī girī āñkheñ bhī ḳhīra ho ga.iiñ

tum to kyā the ik jhalak sī thī tumhārī yaad kī

chal diyā majnūñ to sahrā se kisī jānib magar

ik sadā gūñjī huī hai naala o fariyād kī

naġhma-e-pur-dard chheḌā maiñ ne is andāz se

ḳhud-ba-ḳhud mujh par nazar paḌne lagī sayyād kī

dil huā majbūr jis dam ashk-e-hasrat ban gayā

ruuh jab taḌpī to sūrat ban ga.ī fariyād kī

is harīm-e-quds meñ kyā lafz o ma.anī kā guzar

phir bhī sab bāteñ pahuñchtī haiñ lab-e-fariyād kī

tamtamā uThe vo aariz mere arz-e-shauq par

husn jaag uThā vahīñ jab ishq ne fariyād kī

āshiyāñ meñ ab kisī sūrat nahīñ paḌtā hai chain

thī nazar tāsīr meñ Duubī huī sayyād kī

sher meñ rañgīni-e-josh-e-taḳhayyul chāhiye

mujh ko 'asġhar' kam hai aadat naala o fariyād kī

samne un ke taDap kar is tarah fariyaad ki

main ne puri shakl dikhla di dil-e-nashad ki

ab yahi hai wajh-e-taskin KHatir-e-nashad ki

zindagi main ne dayar-e-husn mein barbaad ki

hosh par bijli giri aankhen bhi KHira ho gain

tum to kya the ek jhalak si thi tumhaari yaad ki

chal diya majnun to sahra se kisi jaanib magar

ek sada gunji hui hai nala o fariyaad ki

naghma-e-pur-dard chheDa main ne is andaz se

KHud-ba-KHud mujh par nazar paDne lagi sayyaad ki

dil hua majbur jis dam ashk-e-hasrat ban gaya

ruh jab taDpi to surat ban gai fariyaad ki

is harim-e-quds mein kya lafz o mani ka guzar

phir bhi sab baaten pahunchti hain lab-e-fariyaad ki

tamtama uThe wo aariz mere arz-e-shauq par

husn jag uTha wahin jab ishq ne fariyaad ki

aashiyan mein ab kisi surat nahin paDta hai chain

thi nazar tasir mein Dubi hui sayyaad ki

sher mein rangini-e-josh-e-taKHayyul chahiye

mujh ko 'asghar' kam hai aadat nala o fariyaad ki