samne un ko paya to hum kho gae aaj phir hasrat-e-guftugu rah gai

sāmne un ko paayā to ham kho ga.e aaj phir hasrat-e-guftugū rah ga.ī

un se kahnā thā rūdād-e-shām-e-alam dil kī dil hī meñ ye aarzū rah ga.ī

ġham ke sāñche meñ ik ik nafas Dhal gayā un kī mahfil meñ ye daur bhī chal gayā

ashk piine se maanā ki dil jal gayā zabt-e-ġham kī magar aabrū rah ga.ī

tere naqsh-e-qadam bhī mile jā-ba-jā terī mahfil tirā āstāñ bhī milā

haañ magar tū kisī ko nahīñ mil sakā ho ke nākām har justujū rah ga.ī

dil meñ dāġhoñ kā jab se hai ik gulsitāñ chhin ga.ī haiñ bahāroñ se rangīniyāñ

ab guloñ meñ vo pahlī sī nik.hat kahāñ 'ārzī raunaq-e-rañg-o-bū rah ga.ī

naaz thā ham ko jin par unhīñ kī qasam vo bhī ulfat meñ nikle na sābit-qadam

be-kasī ke añdhere meñ ai shām-e-ġham ek ham rah ga.e ek tū rah ga.ī

allāh allāh tire husn kī ik jhalak raushnī ho ga.ī az-zamīñ-tā-falak

ek bijlī sī lahrā.ī kuchh duur tak phir Thahar kar mire rū-ba-rū rah ga.ī

aañkh se aañkh aur dil se dil jab milā jaane un kī nigāhoñ ne kyā kar diyā

merī āñkhoñ meñ us roz se ai 'sabā' khiñch ke tasvīr-e-jām-o-subū rah ga.ī

samne un ko paya to hum kho gae aaj phir hasrat-e-guftugu rah gai

un se kahna tha rudad-e-sham-e-alam dil ki dil hi mein ye aarzu rah gai

gham ke sanche mein ek ek nafas Dhal gaya un ki mahfil mein ye daur bhi chal gaya

ashk pine se mana ki dil jal gaya zabt-e-gham ki magar aabru rah gai

tere naqsh-e-qadam bhi mile ja-ba-ja teri mahfil tera aastan bhi mila

han magar tu kisi ko nahin mil saka ho ke nakaam har justuju rah gai

dil mein daghon ka jab se hai ek gulsitan chhin gai hain bahaaron se ranginiyan

ab gulon mein wo pahli si nikhat kahan 'arzi raunaq-e-rang-o-bu rah gai

naz tha hum ko jin par unhin ki qasam wo bhi ulfat mein nikle na sabit-qadam

be-kasi ke andhere mein ai sham-e-gham ek hum rah gae ek tu rah gai

allah allah tere husn ki ek jhalak raushni ho gai az-zamin-ta-falak

ek bijli si lahrai kuchh dur tak phir Thahar kar mere ru-ba-ru rah gai

aankh se aankh aur dil se dil jab mila jaane un ki nigahon ne kya kar diya

meri aankhon mein us roz se ai 'saba' khinch ke taswir-e-jam-o-subu rah gai