sans dar sans raegani mein

saañs dar saañs rā.egānī meñ

kaT ga.ī umr be-dhiyānī meñ

hujra-e-zāt meñ charāġh jalā

rāh-numā.ī thī rāh-e-fānī meñ

maiñ sunātī thī dāstān-e-tarab

dard hañstā rahā kahānī meñ

haiñ zamān-o-makān hijrat meñ

ālam-e-hū kī lā-makānī meñ

koī sūrat sambhal nahīñ paa.ī

vaqt kī be-karāñ ravānī meñ

baat be-bāt hañstī rahtī thī

kitnī gustāḳh thī javānī meñ

bhiiḌ se duur baiThī rahtī huuñ

baat kartī huuñ be-zabānī meñ

phir ye āvāz Duub jā.egī

jism kī be-nishāñ kahānī meñ

vo falak par nahīñ milegā 'sahar'

chāñd kal gir gayā thā paanī meñ

sans dar sans raegani mein

kaT gai umr be-dhiyani mein

hujra-e-zat mein charagh jala

rah-numai thi rah-e-fani mein

main sunati thi dastan-e-tarab

dard hansta raha kahani mein

hain zaman-o-makan hijrat mein

aalam-e-hu ki la-makani mein

koi surat sambhal nahin pai

waqt ki be-karan rawani mein

baat be-baat hansti rahti thi

kitni gustaKH thi jawani mein

bhiD se dur baiThi rahti hun

baat karti hun be-zabani mein

phir ye aawaz Dub jaegi

jism ki be-nishan kahani mein

wo falak par nahin milega 'sahar'

chand kal gir gaya tha pani mein