sanson mein mil gai teri sanson ki bas thi

sāñsoñ meñ mil ga.ī tirī sāñsoñ kī baas thī

bahkī huī nazar thī ki phir bhī udaas thī

be-shak shikast-e-dil pe vo mab.hūt rah gayā

lekin shikast-e-dil meñ bhī zinda ik aas thī

gar tū mire havās pe chhāyā huā na thā

hastī vo kaun thī jo mire dil ke paas thī

bārish se āsmān kā chehra to dhul gayā

dhartī ke hoñT par abhī sadiyoñ kī pyaas thī

koñpal ne aañkh kholī to hairān rah ga.ī

hadd-e-nazar talak ye zamīñ be-libās thī

hoñToñ pe ik gulāb thā taaza khilā huā

āñkhoñ ke ā.inoñ meñ tamannā udaas thī

'anvar'-sadīd sochtā rahtā huuñ in dinoñ

vo kaun thā ki jis ke liye dil meñ pyaas thī

sanson mein mil gai teri sanson ki bas thi

bahki hui nazar thi ki phir bhi udas thi

be-shak shikast-e-dil pe wo mabhut rah gaya

lekin shikast-e-dil mein bhi zinda ek aas thi

gar tu mere hawas pe chhaya hua na tha

hasti wo kaun thi jo mere dil ke pas thi

barish se aasman ka chehra to dhul gaya

dharti ke honT par abhi sadiyon ki pyas thi

konpal ne aankh kholi to hairan rah gai

hadd-e-nazar talak ye zamin be-libas thi

honTon pe ek gulab tha taza khila hua

aankhon ke aainon mein tamanna udas thi

'anwar'-sadid sochta rahta hun in dinon

wo kaun tha ki jis ke liye dil mein pyas thi