saqi-e-gulfam ba-sad ehtimam aa hi gaya

sāqi-e-gulfām bā-sad ehtimām aa hī gayā

naġhma bar lab ḳhum ba sar baada ba jaam aa hī gayā

apnī nazroñ meñ nashāt-e-jalva-e-ḳhūbāñ liye

ḳhalvati-e-ḳhās sū-e-bazm-e-ām aa hī gayā

merī duniyā jagmagā uTThī kisī ke nuur se

mere gardūñ par mirā māh-e-tamām aa hī gayā

jhuum jhuum uTThe shajar kaliyoñ ne āñkheñ khol diiñ

jānib-e-gulshan koī mast-e-ḳhirām aa hī gayā

phir kisī ke sāmne chashm-e-tamannā jhuk ga.ī

shauq kī shoḳhī meñ rañg-e-ehtarām aa hī gayā

merī shab ab merī shab hai merā baada mere jaam

vo mirā sarv-e-ravāñ māh-e-tamām aa hī gayā

bār-hā aisā huā hai yaad tak dil meñ na thī

bār-hā mastī meñ lab par un kā naam aa hī gayā

zindagī ke ḳhāka-e-sāda ko rañgīñ kar diyā

husn kaam aa.e na aa.e ishq kaam aa hī gayā

khul ga.ī thī saaf gardūñ kī haqīqat ai 'majāz'

ḳhairiyat guzrī ki shāhīñ zer-e-dām aa hī gayā

saqi-e-gulfam ba-sad ehtimam aa hi gaya

naghma bar lab KHum ba sar baada ba jam aa hi gaya

apni nazron mein nashat-e-jalwa-e-KHuban liye

KHalwati-e-KHas su-e-bazm-e-am aa hi gaya

meri duniya jagmaga uTThi kisi ke nur se

mere gardun par mera mah-e-tamam aa hi gaya

jhum jhum uTThe shajar kaliyon ne aankhen khol din

jaanib-e-gulshan koi mast-e-KHiram aa hi gaya

phir kisi ke samne chashm-e-tamanna jhuk gai

shauq ki shoKHi mein rang-e-ehtaram aa hi gaya

meri shab ab meri shab hai mera baada mere jam

wo mera sarw-e-rawan mah-e-tamam aa hi gaya

bar-ha aisa hua hai yaad tak dil mein na thi

bar-ha masti mein lab par un ka nam aa hi gaya

zindagi ke KHaka-e-sada ko rangin kar diya

husn kaam aae na aae ishq kaam aa hi gaya

khul gai thi saf gardun ki haqiqat ai 'majaz'

KHairiyat guzri ki shahin zer-e-dam aa hi gaya