saqi sharab la ki tabiat udas hai

saaqī sharāb lā ki tabī.at udaas hai

mutrib rubāb uThā ki tabī.at udaas hai

ruk ruk ke saaz chheḌ ki dil mutma.in nahīñ

tham tham ke mai pilā ki tabī.at udaas hai

chubhtī hai qalb o jaañ meñ sitāroñ kī raushnī

ai chāñd Duub jā ki tabī.at udaas hai

mujh se nazar na pher ki barham hai zindagī

mujh se nazar milā ki tabī.at udaas hai

shāyad tire laboñ kī chaTak se ho jī bahāl

ai dost muskurā ki tabī.at udaas hai

hai husn kā fusūñ bhī ilāj-e-fasurdagī

ruḳh se naqāb uThā ki tabī.at udaas hai

maiñ ne kabhī ye zid to nahīñ kī par aaj shab

ai mah-jabīñ na jā ki tabī.at udaas hai

imshab gurez-o-ram kā nahīñ hai koī mahal

āġhosh meñ dar aa ki tabī.at udaas hai

kaifiyyat-e-sukūt se baḌhtā hai aur ġham

qissa koī sunā ki tabī.at udaas hai

yūñhī durust hogī tabī.at tirī 'adam'

kam-baḳht bhuul jā ki tabī.at udaas hai

tauba to kar chukā huuñ magar phir bhī ai 'adam'

thoḌā sā zahr lā ki tabī.at udaas hai

saqi sharab la ki tabiat udas hai

mutrib rubab uTha ki tabiat udas hai

ruk ruk ke saz chheD ki dil mutmain nahin

tham tham ke mai pila ki tabiat udas hai

chubhti hai qalb o jaan mein sitaron ki raushni

ai chand Dub ja ki tabiat udas hai

mujh se nazar na pher ki barham hai zindagi

mujh se nazar mila ki tabiat udas hai

shayad tere labon ki chaTak se ho ji bahaal

ai dost muskura ki tabiat udas hai

hai husn ka fusun bhi ilaj-e-fasurdagi

ruKH se naqab uTha ki tabiat udas hai

main ne kabhi ye zid to nahin ki par aaj shab

ai mah-jabin na ja ki tabiat udas hai

imshab gurez-o-ram ka nahin hai koi mahal

aaghosh mein dar aa ki tabiat udas hai

kaifiyyat-e-sukut se baDhta hai aur gham

qissa koi suna ki tabiat udas hai

yunhi durust hogi tabiat teri 'adam'

kam-baKHt bhul ja ki tabiat udas hai

tauba to kar chuka hun magar phir bhi ai 'adam'

thoDa sa zahr la ki tabiat udas hai