saqiya kis ko hawas hai ki piyo aur pilao

sāqiyā kis ko havas hai ki piyo aur pilāo

ab vo dil hī na rahā aur umañgeñ na vo chaav

rahne de zikr ḳham-e-zulf-e-musalsal ko nadīm

us ke to dhyān se bhī hotā hai dil ko uljhāo

kūcha-e-ishq meñ jaanā na kabhī bhuul ke tum

hai vahāñ āb-e-dam-e-teġh kā har jā chhiḌkāv

kyā zarūrat ki hasīnoñ ke dahan kī ḳhātir

tum kamar bāñdh ke mulk-e-adamistāñ tak jaao

kyuuñ miTo naqsh-e-qadam saañ kisī raftār pe tum

baiThe biThlā.e ġharaz kyā hai ki ik hashr uThāo

kis tarah koī unheñ raah pe laa.e yārab

aur bargashta hue jaate haiñ jitnā samjhāo

nā-ḳhudā ban ke ḳhudā paar kar is kā beḌā

be-tarah phañs ga.ī hai hind kī mañjdhār meñ naav

ye nahīñ hai ki nahīñ qābiliyyat kuchh un meñ

himmateñ hārne kā ho gayā kuchh un kā subhāv

ġharb hai mashriq-e-ḳhurshed-e-ulūm-o-hikmat

ab ye lāzim hai ki lau apnī udhar ko hī lagāo

jo qadāmat pe uḌe baiThe haiñ vo haiñ gumrāh

un se bachnā haiñ ġhazab un ke utaar aur chaḌhāo

asia ke to tumheñ naam se kahnā hī nahīñ

vahī sūrat hai use kitnā hī ulTo palTāo

rasm-o-maz.hab se na tum ġhair bano aapas meñ

ho chalat meñ koī yā Thaah meñ sam par mal jaao

bas karo rahne bhī do vāz-o-nasīhat 'kaifī'

nāsehoñ ko to yahāñ paḌtī haiñ bāzār ke bhaav

saqiya kis ko hawas hai ki piyo aur pilao

ab wo dil hi na raha aur umangen na wo chaw

rahne de zikr KHam-e-zulf-e-musalsal ko nadim

us ke to dhyan se bhi hota hai dil ko uljhao

kucha-e-ishq mein jaana na kabhi bhul ke tum

hai wahan aab-e-dam-e-tegh ka har ja chhiDkaw

kya zarurat ki hasinon ke dahan ki KHatir

tum kamar bandh ke mulk-e-adamistan tak jao

kyun miTo naqsh-e-qadam san kisi raftar pe tum

baiThe biThlae gharaz kya hai ki ek hashr uThao

kis tarah koi unhen rah pe lae yarab

aur bargashta hue jate hain jitna samjhao

na-KHuda ban ke KHuda par kar is ka beDa

be-tarah phans gai hai hind ki manjdhaar mein naw

ye nahin hai ki nahin qabiliyyat kuchh un mein

himmaten haarne ka ho gaya kuchh un ka subhaw

gharb hai mashriq-e-KHurshed-e-ulum-o-hikmat

ab ye lazim hai ki lau apni udhar ko hi lagao

jo qadamat pe uDe baiThe hain wo hain gumrah

un se bachna hain ghazab un ke utar aur chaDhao

asia ke to tumhein nam se kahna hi nahin

wahi surat hai use kitna hi ulTo palTao

rasm-o-mazhab se na tum ghair bano aapas mein

ho chalat mein koi ya Thah mein sam par mal jao

bas karo rahne bhi do waz-o-nasihat 'kaifi'

nasehon ko to yahan paDti hain bazar ke bhaw