sare aalam mein teri KHushbu hai

saare aalam meñ terī ḳhushbū hai

ai mere rashk-e-gul kahāñ tū hai

barchhī thī vo nigāh dekho to

lahū āñkhoñ meñ hai ki aañsū hai

ek dam meñ hazār daftar tai

chashm-e-hasrat ġhazab suḳhan-go hai

tū hī tū aur baal baal apnā

fāḳhta aur shor-e-kū-kū hai

tujh ko dekhe phir aap meñ rah jaa.e

dil par itnā kisī ko qaabū hai

josh-e-ashk o tasavvur-e-qad-e-yār

sarv goyā khaḌā lab-e-jū hai

had na pūchho hamārī vahshat kī

dil meñ har daaġh chashm-e-āhū hai

jis ne momin banā liyā ham ko

vo tumhārā hī mus.haf-e-rū hai

jis ke kushte haiñ zinda-e-jāved

vo tumhārī hī teġh-e-abrū hai

dil jo be-mudda.ā ho kyā kahnā

yahī vīrāna ālam-e-hū hai

pul bhī hai faḳhr-e-jaunpur 'āsī'

ḳhvāb-gāh-e-janāb-e-sheḳhū hai

sare aalam mein teri KHushbu hai

ai mere rashk-e-gul kahan tu hai

barchhi thi wo nigah dekho to

lahu aankhon mein hai ki aansu hai

ek dam mein hazar daftar tai

chashm-e-hasrat ghazab suKHan-go hai

tu hi tu aur baal baal apna

faKHta aur shor-e-ku-ku hai

tujh ko dekhe phir aap mein rah jae

dil par itna kisi ko qabu hai

josh-e-ashk o tasawwur-e-qad-e-yar

sarw goya khaDa lab-e-ju hai

had na puchho hamari wahshat ki

dil mein har dagh chashm-e-ahu hai

jis ne momin bana liya hum ko

wo tumhaara hi mushaf-e-ru hai

jis ke kushte hain zinda-e-jawed

wo tumhaari hi tegh-e-abru hai

dil jo be-muddaa ho kya kahna

yahi virana aalam-e-hu hai

pul bhi hai faKHr-e-jaunpur 'asi'

KHwab-gah-e-janab-e-sheKHu hai